Татарстандагы ата-аналар көн саен балаларының мәктәптә өлгерешенә кагылышлы 70 меңгә якын смс-хәбәр ала

Татарстандагы ата-аналар көн саен балаларының мәктәптә өлгерешенә кагылышлы 70 меңгә якын смс-хәбәр ала. Республикада әлеге төр хезмәт “ТР да Электрон мәгариф” системасы кысаларында 2011 елдан күрсәтелә башлаган иде. Шул вакыттан бирле ата-аналарга телефон аша 4 млн га якын кыска хәбәр юлланган.
ТР Мәгълүматлаштыру һәм элемтә министрлыгыннан хәбәр итүләренчә, балаларының мәктәпкә йөрүе һәм өлгереше хакында оператив хәбәр алу өчен, бүгенге көндә әлеге түләүсез хезмәттән 120 мең ата-ана файдалана.
Әлеге сервиска ялгану өчен, “ТР да Электрон мәгариф” мәгълүмат системасындагы шәхси кабинетның SMS-рассылка бүлегенә кереп, телефон номерын язарга һәм смс-хәбәр алуга ризалык бирү генә кирәк. Операцияне башкарганнан соң, әлеге күрсәтелгән номерга раслау кодын эченә алган кыска хәбәр киләчәк. Аны да шәхси кабинетка кертергә кирәк булачак.