“Яшел ут” республика конкурсының финалы - Бөгелмәдә

5-6 апрельда Бөгелмә каласында “Яшел ут”/”Зеленый огонек” республика смотр-конкурсы финалы була. Мәктәпкәчә белем бирү учреждениеләре һәм тәрбиячеләр арасында балаларның юлда транспорт һәлакәтләренә юлыгуын профилактикалау буенча уздырыла торган әлеге конкурс сабыйларны юлларда куркынычсызлык кагыйдәләрен төгәл үтәп йөри белергә өйрәтүне җанландыруны максат итә.
Республика ЮХИДИ идарәсеннән алынган мәгълүмат буенча, ике этаптан торган конкурсның башлангычында район һәм шәһәрләрдә бу мәсьәләдә көчлеләр сайланган, икенче этабы 5-25 мартта республика югарылыгында уздырылган. Аның барышында Татарстан шәһәрләрендәге һәм авылларындагы иң яхшы 5әр мәктәпкәчә белем бирү учреждениесе һәм тәрбиячесе тәгаенләнгән. Алга таба тәрбиячеләр юл йөрү кагыйдәләре буенча имтихан тота, шушы темага балалар өчен дәреснең бер өлешен үткәрә, нәтиҗәдә, призлы урыннарга 3әр педагог сайлап алына.
Әлеге чара ТР Мәгариф һәм фән министрлыгы, ТР буенча ЭЭМның ЮХИДИ идарәсе, ТР юл хәрәкәте куркынычсызлыгы фәнни һәм белем бирү программаларын финанслау дирекциясе, Тормыш иминлеге фәнни үзәге тарафыннан оештырылган.
Конкурс финалы кысаларында балаларның юлда транспорт белән бәйле һәлакәтләргә очрап имгәнүләрен профилактикалау мәсьәләләре буенча семинар-киңәшмә дә уздырылачак.