“2012 елда Россиядә яшүсмерләр сигезлеге” бәйгесенең республика этабы тәмамланды

“2012 елда Россиядә яшүсмерләр сигезлеге” бәйгесенең республика этабы тәмамланды. Анда Татарстанның 20 район һәм шәһәрләреннән 74 югары сыйныф укучысы катнашты. Сигезе икенче этапка чыкты.
Укучылар тәкъим ителгән ун тема буенча рус һәм инглиз телләрендә эссе язарга тиеш иде. Алар арасында «Универсиада – 2013: яшьлек, сәламәтлек һәм спорт бәйрәме», «Толерантлык – кешелекнең яшәеш нигезе», «Борынгы, бөек һәм кодрәтле рус теле. Мин аны ни өчен яратам?!» һәм «Идел буе федераль округы халыкларны берләштерә» темалары популяр булды.
Казанда үтәчәк икенче этапта төбәк дәрәҗәсендә җиңү яулаган сигез укучы 16-22 апрель көннәрендә Татарстан исеменнән чыгыш ясаячак. Анда Идел буе федераль округында беренче этапта җиңгән йөзгә якын укучы катнашачак.
Атна дәвамында аларны әңгәмәләр, тәкъдим итүләр, эшлекле уеннар, инглиз телен ни дәрәҗәдә белүне тикшерү өчен, тестлар көтә. Бәйгедә катнашучыларга аралашу, үз фикерен бөтен тирәнлеге белән җиткерә белү, командада эшләү юнәлешендәге осталыгын күрсәтергә кирәк булачак.