Рус теле БДИнан куып чыгарылган татарстанлыларга имтиханны яңадан тапшырырга рөхсәт бирәчәкләр

31 майда мәҗбүри рус теле БДИнан куып чыгарылган укучыларга имтиханны яңадан тапшырыга рөхсәт биреләчәк. Бу хакта бүген Казанда журналистлар белән әңгәмәсендә ТР мәгариф һәм фән министрының беренче урынбасары Данил Мостафин хәбәр итте.
Исегезгә төшерик, 31 майда имтиханда кәрәзле телефон һәм шпаргалка кулланган өчен 16 Татарстан укучысы БДИнан чыгарып җибәрелгән иде. ТР Арча районында имтиханнан күчергән өчен 4 укучы, Азнакай – 4, Актаныш – 2, Буа – 1, Кукмара -1, Мөслим - 3, Теләче – 1 укучы куып чыгарылган иде. Аннан алда яңадан имтиханны тапшыру хокукын югалтып, тарих, биология һәм информатика буенча БДИнан 12 кеше куып чыгарылды.
Данил Мостафин белдерүенчә, Дәүләт имтихан комиссиясе карары нигезендә 16 укучының да рус теленнән БДИ нәтиҗәләре бетерелде, һәм аларга 20 июньдә яңадан имтиханны тапшыру мөмкинлеге бирелә.
“Без тиз арада Дәүләт имтихан комиссиясе утырышын үткәрергә мәҗбүр булдык. Чөнки укучылар телефон һәм шпаргалкалардан файдалана алмадылар, ә факт бары тик билгеләнгән иде. Алар барысы да кисәтелгән, һәм әгәр дә мондый хәл тагын кабатланса, аларга карата иң кырыс чаралар күреләчәк, - дип белдерде Данил Мостафин. – Без мәҗбүри имтиханның нәтиҗәләре аттестат алуга тәэсир итүен истә тоттык. Дорфа тәртип бозулар күзәтелмәгәч, без шундый карар кабул иттек. Дәүләт имтихан комиссиясенең барлык вәкилләре мондый карарны хуплады”.
“Ләкин бу алга таба мондый эшләр хупланып килер дигән сүз түгел. Мәгариф белән идарә итә торган барлык органнар, барлык имтиханнарны оештыручылар һәм укучылар катгый чаралар күрелүе турында кисәтелгән”, - дип кисәтте министр урынбасары.
ТР Мәгариф һәм фән министрлыгы башлыгы урынбасары билгеләвенчә, 28 майда беренче БДИ тапшыру кысаларында 12 вакыйгага бәйле бу тәртип бозуларда барлык катнашучыларга карата административ эш кузгатыла. Уңай карарга килсәләр, имтихан кабул итү пунктына 100 мең сум штраф салынырга мөмкин. Аның сүзләренә караганда, 4 июньдә чит телләр һәм химиядән БДИ тапшырган вакытта бер тәртип бозу очрагы теркәлгән. ТР Арча районында бер укучы кәрәзле телефон кулланганы өчен инглиз теле имтиханыннан чыгарып җибәрелгән, аның быел яңадан имтиханны тапшыру хокукы юк.