Быелгы БДИның алдан чыгарылган нәтиҗәләре игълан ителде: кичәге 25 меңнән артык укучы дәүләт аттестациясен уза алмаган

Россия Федерациясе субъектларының һәммәсендә һәм 49 чит дәүләттәге илчелекләр, РФ хәрби частьләрендәге мәктәпләрдә Бердәм дәүләт имтиханнарын уздыруның төп өлеше тәмам. Быел барлыгы 843 мең егет һәм кыз шундый сынау узган, аларның 780 меңнән артыгы – чыгарылышлар.
Бердәм дәүләт сынавын үткәрү өчен җәмгысе 7 меңнән артык пунк оештырылган, аларда исә имтихан уздыру таләп-шартларын 34,3 мең иҗтимагый күзәтче карап-тикшереп торган.
Имтихан тапшыручыларның 54 проценты үзе өчен җәмгыять белеме буенча сынау узуны хуп күргән, физиканы 25 проценты сайлаган, биологияне – 19, тарихны – 18, шулай ук “популярлык ала алмаган” дип исәпләгәннәре география – 2,8 процент һәм рус әдәбияты – 5 процент. Укучыларның күпчелеге, 325,2 меңе, 3әр һәм 316,8 меңе 4әр фәннән имтихан тапшырган, 2шәр предметтан – 100,8 мең кеше, 5әрдән – 70,9 меңе, нибары 1не – 15 меңе, 6шарны – 11,8 меңе, 7шәрне 2,6 мең кеше, 8әрне – 667.
Хәзерге вакытта БДИның төп һәм резерв көннәрдә тапшырылган нәтиҗәләре билгеле.
Алдан чыгарылган нәтиҗәләр буенча, 25 меңнән артык чыгарылыш класс укучысы, ә бу 3,25 процент дигән сүз, дәүләт аттестациясен уза алмаган, ләкин бу күрсәткеч апелляцияләр каралып беткәч һәм июльдәге өстәмә БДИ нәтиҗәләре буенча беркадәр үзгәрергә мөмкин.
Тикшерүче-күзәтүчеләр билгеләп үткәнчә, БДИ тапшыручыларның имтихан барганда Интернетка чыгу очраклары, былтыргыдан аермалы буларак, йөзләрчә тапкырга азрак булган. Имтиханнарны контроль-исәпләү материалларын (КИМ) ел да камилләштерә барып, нәтиҗәләре игълан ителгәннән соң билгеләрне яңадан карап чыгарлык хаталар бу юлы теркәлмәгән. КИМ структурасын үзгәртү нәтиҗәсендә, минималь балл бусагалары 2011 елдагыдан күтәрелгән, шуңа бәйле рәвештә, аны уза алмаганнар саны да арткан. Аерым алганда, тарих буенча быел бусага 32 балл (2гә югарырак) тәшкил иткән һәм аны 12,4 процент имтихан бирүче уза алмаган (былтыр – 9,4 проценты); химиядән – 36 балл (4кә артыграк) һәм 13,6 проценты төшеп калган (былтыр – 8,4 проценты), физикадан – 36 балл (3кә югарырак) һәм 13,6 проценты узмаган (былтыр – 7,4 проценты), географиядән – 37 балл (2гә артык) һәм анысы 8,4 проценты өчен буй җитмәслек булган (былтыр – 6,3 процентына). Бу исә мәктәп тәмамлаучыларның әзерлек сыйфатына таләпләр катгыйлануга таләпләр артуы турында сөйли, нәтиҗәдә, шушы хәл һөнәри уку йортларына абитуриентлар сайлап алуда объективлыкка китерер дип фаразлана.
Россия мәгариф һәм фән өлкәсендә күзәтчелек буенча федераль хезмәтеннән алынган белешмәдә шулар хакында әйтелә.