Казанның 30 елдан артык хезмәт иткән 134 мәктәп бинасы 3 ел эчендә капиталь төзекләндереләчәк

Президент программасы ярдәмендә Казанның 30 елдан артык хезмәт иткән 134 мәктәп бинасы 3 ел эчендә капиталь төзекләндереләчәк. Быел шушы максаттан 44 мәктәп өлешенә 919 млн. сум акча бүлеп бирелгән.
ТР Фәннәр академиясендә барган Казан күләмендәге август конференциясенең пленар утырышында шул хакта әйткән мәгариф идарәсе җитәкчесе Илсур Һадиуллин, моның кадәр күләмдә еллык финанслау булганы юк иде әле, дип билгеләп үтте. Капиталь ремонттан тыш, җәен 60 млн. сумлык агымдагы ремонт эшләре башкарылды, андый төзекләндерү эшләренә соңгы 3 елда шәһәр бюджетыннан 200 млн. сум акча бирелде, диде ул. Утырышта катнашкан мэр Илсур Метшин, мәктәпләрне матди-техник яктан тәэмин итүгә, капиталь ремонтлауга соңгы 6 елда 82 млрд. сум акча сарыф иттек, әле күбрәк бирәсе иде, ләкин мөмкинлекләрдән чыгып эшләргә туры килә, без үзебезнең Президентыбызга һәртөрле ярдәме һәм, барыннан да элек, мөнәсәбәте өчен рәхмәтле, диде. Аерым алганда, шәһәр үзе дә бюджетыннан 6,5 млрд. сум бүлеп бирде һәм бу өченче елдагы суммадан 1 млрд. сумга күбрәк, гомумән, бюджет акчасының 50 проценттан артыгын мәгариф өлкәсенә бирә бара, дип, мэр шәһәр Думасы депутатларына да бу мәсьәләдә теләктәшлектә булуларыннан канәгатьлек белдерде.
Моннан тыш, балалар бакчаларының 60 проценттан артыгына капиталь ремонт кирәк, диелде утырышта. Искәртеп үтәбез: хәзер Казанда 44632 урынга исәпләнгән 294 мәктәпкәчә белем бирү учреждениесе гамәлдә һәм аларга 55026 бала йөри. Барлыгы 9 гаилә бакчасы бар, аларда күп балалы гаиләләрнең 27 баласы тәрбияләнә. 218 мәктәпкәчә учреждение автоном режимда эшли.
Мәгариф учреждениеләрен ремонтлауга ата-аналардан акча җыю мәсьәләсенә тукталып, мэр, мин аңлыйм, моны балаларга әйбәт булсын дигән нияттән чыгып эшлисез, ләкин ата-ананы талауга кайтып калмасын, ахыр чиктә, күздә тотылган эшләр үтәлеп бетмәгән килеш калсын, диде.