Яңа уку елына Казанның 1 мең чамасы баласын 19 мәктәп авобусы белән 21 маршрут буенча ташу күздә тотыла

Казан мәктәпләрен яңа уку елына әзерләү чорында балаларның куркынычсызылыгы мәсьәләсенә игътибар зурдан булды. Барлык гомумбелем бирү учреждениеләре дә физик сакчылык ягыннан тәэмин ителде, 165 мәктәп “хәвефлек төймәсе”системасына кертелде, 50 мәктәп видеокүзәтү системасы белән җиһазландырылды. Шулай ук өстәмә белем бирү мәктәпләренең һәркайсы автомат янгын сигнализациясе белән баетылды.
Янгынга каршы тору чаралары кысаларында электр челтәрләре алыштырыла яки яңартыла, агач конструкцияләр ялкын теленә бирешми торган матдә белән йөгертелә, барлык мәктәпләр дә янгын булган очракта янгын сакчылыгы часте пультына туры чыга торган “Стрелец-мониторинг” системасы белән тәэмин ителә.
Бүген Казан җитәкчелегенең “эшлекле дүшәмбе” киңәшмәсендә мәгариф идарәсе башлыгы Илсур Һадиуллин шулай дип хисап тотты. Аның сүзләренчә, янгынга каршы чараларга 28 млн. сум акча бүлеп бирелгән булган, 4,5 млн. сум чамасы – террорчылыкка каршы чараларга. Тагын 171 мәктәпкә 4,4 млн. сумнан артык суммада акча балаларның гомеренә куркыныч янамасын өчен хәстәрен күрүгә бирелгән. Шуларга өстәп, 34, 57, 78, 80, 177 нче мәктәпләр һәм 121 нче лицей кебек ресурс үзәкләрендә физик мөмкинлекләре чикләнгән балалар да үтеп йөри алырлык мохит булдыру буенча эш башланган һәм шуңа 11,5 млн. сум акча каралган. Боларга өстәп, яңа уку елына 1 мең чамасы баланы 19 мәктәп авобусы белән сертификацияле 21 маршрут буенча ташу күздә тотыла, диде И.Һадиуллин.