Мәгарифкә кагылышлы соравың булса - шалтырат

28-29 август көннәрендә татарстанлылар мәгариф мәсьәләләренә багышланган “кайнар линия”гә шалтырата ала. Иртәнге 10нан алып кичке 5кә кадәр республика халкы 8(843) 236-40-62, 236-40-98, 236-29-39 номерлары буенча шалтыратып, мәгариф өлкәсенә кагылышлы үзләрен кызыксындырган сорауларын юнәлтә ала. Татарстанда Кеше хокуклары буенча вәкил аппараты, Бала хокуклары буенча вәкил аппараты, республиканың Мәгариф һәм фән министрлыгы, шулай ук “Татарстан Республикасының Яшь юристлар берлеге” һәм республика Дәүләт Советы каршындагы Яшьләр иҗтимагый палатасының хокукый мәсьәләләр буенча комиссия вәкилләре халык сорауларына җавап бирәчәк, бәхәсле мәсьәләләрне чишәргә ярдәм итәчәк.
Әлеге чараны Татарстанның кеше хокуклары буенча вәкиле халыкка хокукый ярдәм күрсәтү максатыннан оештырган. “Хәерге сәгатькә алтмыштан артык шалтырау килеп иреште. Сораулар төрле - балаларның беренче сыйныфка баруы, югары уку йортына кергәндә документларның оригиналының ни өчен кирәклеге, тулай торак алу, училище, колледжда уку буенча сораулар булды”, - дип сөйләде Intertat.ru газетасына Татарстанның Кеше хокуклары буенча вәкил аппаратының хәбәри-аналитик бүлеге җитәкчесе Раилә Мөһәммәтханова.