1 сентябрь - Белем көне кысаларында Татарстан мәктәпләрендә бердәм Универсиада дәресе уздырыла

1 сентябрь - Белем көнендә Татарстанның барлык уку йортларында традицион “Батырлык дәресе” түгел, ә "Казан-2013" Башкарма дирекциясе тарафыннан оештырылган "Универсиада дәресе" узачак. Россия киңлекләрендәге белем учакларының кайсыларында “Тынычлык дәресе”, кайберләрендә “Белем дәресе” үткәреләчәк.
Аерым алганда, ТР муниципалитетларында август конференциясенең пленар утырышларына килүчеләргә республиканың белем бирү учреждениеләрендә “Универсиада дәресе” уздыру өчен диск һәм методик материаллар тупланмасы өләшенде. 2013 елның июлендә Казанда узачак студентларның Бөтендөнья спорт уеннарына әзерләнү һәм үткәрү турында класстан тыш дәрес кысаларында укучыларга аңлаешлы һәм кызыклы формада сөйләп, Универсиадалар тарихы, символикасы, спорт һәм волонтерлык программасы хакында белешмә биреләчәк. Дәрес уздыру материаллары укучылар яше буенча 4 подгруппа өчен әзерләнгән: башлангычлар, урта класслар, өлкәннәр, ягъни 9-11 нчеләр һәм студентлар өчен. Бу, барыннан да элек, татарстанлыларда әлеге гаять зур чарага, Универсиадага агылырга тиешле кунакларга карата уңай мөнәсәбәт, волонтерлык хәрәкәтенә кушылу теләге формалашсын өчен эшләнә, шуңа күрә, мондый дәресләрне һөнәри белем бирү йортларында да үткәрү күздә тотыла. “Укучыларның җәмгыятьтәге вакыйгаларга мөнәсәбәте, мәгълүматлылыгы дәрәҗәсе, активлыгы укытучыдан тора... 1 нче сентябрьдә барлык белем бирү учреждеиниеләрендә дә “Универсиада дәресе” уздырып, һәрбер мәктәп баласы, студент 2013 елдагы Универсиада турында белер, аңа әзерлектә үзенә урын табар, студентлар Уеннарыннан һәм аның мирасыннан үзе өчен мөмкин кадәр күбрәк файда табар дип ышаныч багларга була”, - диелә укытучыларга әзерләнгән методик басмада.
Казан күләмендәге август конференциясенең пленар утырышында “Казан-2013” Башкарма дирекциясенең генераль директоры киңәшчесе Лариса Сулима белдергәнчә, Универсиада вакытында 20 мең волонтер эшләргә тиеш (Лондон Олимпиадасына 70 мең җәлеп ителгән), ләкин бездә әлегә кадәр 9 меңнән артыгын җыюга ирешелмәгән. Дөрес, дирекция сайтында 20 меңнән артык заявка бирелгән, әмма шуларның 5,7 меңе генә казанлы, 12 меңе – Россия төбәкләреннән. Волонтерлык хәрәкәтенә күбрәк казанлылар, ахыр чиге татарстанлылар кушылса отышлырак санала, чөнки аларны уеннар барышында торак, туклану ягыннан тәэмин итәсе бар, дөрес, мэр фатирларга урнаштырачакбыз, дип ышандыра ышандыруын.