ТР мәгариф һәм фән министры мәктәпләрдә дәреслекләрнең булмавы турындагы хокук саклаучыларның гаризасын кире какты

ТР мәгариф һәм фән министры Альберт Гыйльметдинов мәктәпләрдә дәреслекләр булмау трындагы Казан хокук саклаучыларының гаризасын кире какты.
“Алар әйткән сүзләр – тулысынча ялган. Бу мәгълүматны таратып, алар үзләренә хөкем чыгарды. Без үз артыбыздан адекват җавап бирү хокукын калдырабыз”, - дип белдерде журналистлар белән очрашуында министр. Альберт Гыйльметдинов сүзләренчә, хокук саклаучылар гаризасыннан соң, дәреслекләр җитмәгән мәктәпләр тикшерелгән. “Барлык каралган очраклар буенча хокук саклаучылар мәгълүматы расланмады. Уку елы башына федераль исемлектәге барлык дәреслекләрнең мәктәпләргә килүе документаль яктан расланган”, - дип өстәде ул. Проблемалар төбәк исемлегендәге дәреслекләр белән була ала, чөнки федераль исемлектәге дәреслекләрне татар теленә тәрҗемә итәргә һәм алга таба бастырып чыгарырга кирәк, диде министр. Аның сүзләренчә, федераль исемлектә расланмаган дәреслекләрне алдан тәрҗемә итәргә ярамый. “Бу билгеле бер риск. Ләкин быел без, федераль исемлекнең чыгуын көтеп тормыйча, моны эшләп карарга булдык, чөнки федераль исемлектәге дәреслекләр белән хәл стабильләште, һәм бу дәреслекләрне файдалануны тыю куркынычы бик аз. Шуңа күрә быел бу дәреслекләр бераз тоткарланачак, ләкин бик азга гына. Алар мәктәпләргә якындагы ике атна эчендә килеп җитәчәк”, - дип хәбәр итте Альберт Гыйльметдинов. Ул шулай ук дәреслекләр белән тәэмин итү һәрвакыт 100 процентка идеаль булмаячак, дип белдерде. Быел дәреслекләр алырга өстәмә 66 миллион сум акча бүлеп бирелгән. Узган елда бу максатларда бюджет 64 миллион сумны тәшкил иткән. Өстәмә бүлеп бирелгән акчалар ярдәмендә ТР Мәгариф һәм фән министрлыгы 1 миллион 170 мең данә дәреслек сатып алган. Ә Татарстанның мәктәп китапханәләрендә барлыгы 6 милилон 303 мең данә дәреслек әйләнештә йөри, бу китапка ихтыяҗның 140 процентын тәшкил итә. Бу бик күп, диде министр. Күп очракта ата-аналардан акча дәреслекләр түгел, ә бер тапкыр гына кулланыла торган уку-укыту әсбапларын (эш дәфтәрләре, контур карталары һ.б.) сатып алырга җыеп алына.
Белешмә өчен: ТРда барлыгы 2 мең мәктәп, аларда якынча 400 мең бала белем ала.