Яшел Үзәндә быел күп еллардан бирле беренче тапкыр балаларның хезмәт һәм ял лагерьлары эшләгән

2012 елда Яшел Үзәндәге гомуми белем бирү мәктәпләре базасында күп еллардан бирле беренче тапкыр балаларның хезмәт һәм ял лагерьлары эшләгән. 14 яшьтән өлкәнрәк 500 яшүсмер егет һәм кыз шәһәр һәм районның 22 мәктәп базасында ял иткән һәм бер үк вакытта акча да эшләгән. Мондый төр лагерьны оештыручылар фикеренә караганда, хезмәт күнекмәләренә өйрәнгән укучылар эштән дә, ялдан да канәгать калган, дип хәбәр итә “Яшел Үзән” газетасы. Җәйге каникул чорында 4160 бала оешкан төстә ял иткән, ел ахырына кадәр тагын 1000нән артык бала мәктәпләрдә һәм шифаханәләр базасында оештырылган лагерьда ял итәргә өлгерәчәк.– 4 июньнән башлап шәһәр һәм район территориясендә 22 мәктәптә 2270 урынга балалар өчен көндезге ял лагеры оештырылган иде, – ди Яшел Үзән муниципаль район башкарма комитетының яшьләр эшләре, спорт һәм туризм идарәсе җитәкчесе Алексей Сафин. – Мәктәптә оештырылган лагерьларда алдынгы тәҗрибәне ачыклау һәм аны тарату максатыннан, тәрбия эшчәнлегенең иң яхшы компьютер презентациясенә бәйге оештырылган иде. Анда I урынны Осиновоның С.Гыйматдинов исемендәге гимназиясе (лагерь начальнигы Э.Латыйпова) яулады. II һәм III урыннарны Васильевоның 1нче мәктәбе (В.Габдрахманова) һәм 10нчы гимназия (Л.Гурьянова) бүлеште. Мәктәп укучылары ТР Мәгариф һәм фән министрлыгы оештырган профильле лагерьларда да ял итү бәхетенә иреште. 9 сәләтле бала Анападагы «Прометей» лагерында ял итеп кайтса, 11 укучы «Мирас-2012» Татарстан варислары активының Анапа шәһәрендәге «Витязево» лагерында узган республика сборында катнашты. Шулай да балаларның иң яраткан ял итү урыны – күп еллар дәвамында эшләп килүче сәламәтләндерү лагерьлары. 5 стационар лагерьда – «Чайка», Муса Җәлил исемендәге, «Горьковец», «Сосновый бор» һәм «Васильевский»да (соңгы икесе шифаханә базасында) 1320 бала (720се – сәламәтләндерү сменасында, 600е – сәләтле балалар өчен оештырылганында) сәламәтлеген ныгыткан. «Форпост» – республика хокук тәртибен саклау хәрәкәте яшь активистларының җәйге ялын беренче мәртәбә районда оештыруны да уңай күренеш буларак билгеләп үтәргә кирәк. Яшьләр 18 көн дәвамында төрле спорт ярышларында да катнашкан, теория буенча да белемен ныгыткан. Полиция һәм «Барс» оператив отряд хезмәткәрләре яшьләрне, дөрес атларга, пневматик коралдан атарга, окоп казырга гына өйрәтеп калмыйча, сугыш коралыннан ату һәм штыкка-штык килеп сугышу күнекмәләренә дә өйрәткән. Көзге каникул көннәрендә 800 бала мәктәп базасында оештырылган лагерьга путевка алса, 200 бала шифаханә базасындагы лагерьга юл тотачак.