Рафис Борһанов: "Россиянең теләсә кайсы мәктәбендә бөтен илгә үрнәк булырлык укытучы табылачак"
Россиянең теләсә кайсы мәктәбендә бөтен илгә үрнәк булырлык укытучы табылачак. ТР Мәгариф һәм фән министры Рафис Борһанов Казанның 2 нче лицей-интернатында журналистлар белән әңгәмәсендә шундый фикер белдерде.
Татарстан Республикасы Мәгариф һәм фән министры бүген «Россия Ел укытучысы-2019» Бөтенроссия конкурсы призеры, 2 нче лицей-интернатның биология укытучысы Наил Мирсәетов белән очрашты.
Татарстан педагогларының мондый конкурсларда катнашуы турында сөйләгәндә, Борһанов билгеләп үткәнчә, «Һәркем үзен конкурентлы мохиттә күрсәтә һәм яклый белергә тиеш, шул чакта ул үзенең дөрес юлда барамы-юкмы икәнлеген күрәчәк». Моннан тыш, министр фикеренчә, андый ярышларда катнашып, педагоглар үз тәҗрибәләрен һәм практикаларын баеталар. «Ышанам, Мәскәүнең иң яхшы мәктәбендә генә түгел, ә ерак төбәктә дә һәрвакыт үрнәк булырлык укытучы табылыр», – дип ассызыклады ул.
«Мондый конкурслар безгә үз программаларыбызны иң яхшы дип саналган педагогларның фикеренә таянып төзәтмәләр кертергә ярдәм итә. Билгеле, балаларны яраткан һәм аларга белем бирергә теләгән кеше тирән яшькә кадәр шундый булып кала. Шуңа күрә безнең педагоглар пенсиягә чыккач та эшли, чөнки аларда энергия күп, шулай ук укучыларыбыз тарафыннан кирәкле тәҗрибә туплана», – дип өстәде Рафис Борһанов.