Шәрәф Мөдәррис иҗатына багышланган төбәкара фәнни-тикшеренү конференциясе
8 ноябрьдә Татарстан Республикасы Чүпрәле муниципаль районы мәгариф бүлеге белән берлектә Марс урта гомуми белем бирү мәктәбе базасында Шәрәф Мөдәррис иҗатына багышланган төбәкара фәнни-тикшеренү конференциясе үткәрелде.
Аның эшендә Татарстан Язучылар берлеге, «Ульяновск өлкәсе татар милли-мәдәни автономиясе» иҗтимагый оешмасы вәкилләре, Ульяновск өлкәсе, Чуашстан Республикасы мәгариф оешмаларының татар теле һәм әдәбияты укытучылары, татар теле һәм әдәбияты укытучылары, Чүпрәле муниципаль районы татар теле һәм әдәбияты укытучылары катнашты.
Конференциянең максаты-укучыларны күренекле публицист, тәрҗемәче, фронтовик шагыйрь Шәрәф Мөдәрриснең иҗади мирасы белән таныштыру, фәнни-тикшеренү эше күнекмәләрен формалаштыру, сәләтле балаларны ачыклау һәм аларның үсеше өчен шартлар тудыру.
Укучыларның эшләрен һәм чыгышларын Казан федераль университеты, Татарстан Республикасы Мәгарифне үстерү институты галимнәре һәм укытучылары бәяләде. Җиңүчеләргә I, II, III дәрәҗә дипломнар тапшырылды.