Татарстан Республикасы Мәгариф һәм фән министрлыгы

Тукай районындагы “Таңбатыр” балалар бакчасы үзенең 70 еллыгын билгеләп үтте

2012 елның 26 ноябре, дүшәмбе

Тукай муниципаль районының Күзкәй авылындагы “Таңбатыр” балалар бакчасы үзенең 70 еллыгын билгеләп үтте.
Район мәгариф бүлеге башлыгы Рамил Исаевның чыгышыннан аңлашылганча, “Таңбатыр” балалар бакчасы 1988 елдан бирле инде мәктәп канаты астында яши икән. Димәк, мәктәп директоры, Күзкәй авылы башлыклары бүгенге оптимальләштерүне әллә кайчан ук башлаган. Һәм әйтергә кирәк, бакча менә дигән шартларда яши. Рамил Робертович күчтәнәчкә район башкарма комитетының Рәхмәт хатын һәм сертификат алып килгән иде. Балалар бакчасы мөдире Гүзәлия Саматовага, тәрбиячеләр Рәзилә Нуриевага, Гөлнәзирә Харисовага район мәгариф идарәсенең Рәхмәт хатларын тапшырды.
Юбилей кичәсен бакча мөдире Гүзәлия Саматова белән Гөлнара Сәхапова шулкадәр оста, көйләп алып баралар. Экранда “сценарий” геройлары – төрле елларда эшләгән тәрбиячеләр, мөдирләр, техник хезмәткәрләр, алар турында мәгълүматлар. Ул да түгел, олылап, кунакларга сүз бирәләр. Элек авыл Советы рәисе булып эшләгән Флүрә Нуриева, бакча бинасы җимерелә башлагач, аны мәктәпкә күчерү тәкъдимен әйткән Мирзаян Мансуровичка бүген дә рәхмәтле.
– Бина иске иде. Кыш чыгу өчен ел саен 120 кубометр утын кистерәбез. Мәктәпкә күчү үзе оҗмах булды. Үземнең биш балам монда тәрбияләнде, бүген ике оныгым йөри. Хәмдия Акмаловага аерым рәхмәт әйтәсем килә. Уеннар аша сабыйларга авырлыкларны җиңәргә өйрәтте ул.
– Ул чагында оптимальләштерү дигән нәрсә истә дә юк, без моны 25 ел элек эшләдек һәм ул уңышлы чыкты, – дип дәвам итте мәктәп директоры Мирзаян Шәйхаттаров. – Бер максатка, бергәләп эшлибез. Балалар мәктәпкә күнегеп үсәләр, ияләшеп китү өчен уңайлы. Бакча мөдире Гүзәлия Саматова да булдырырга, яхшыртырга тырыша. Бик матур иҗади коллектив эшли монда.
Ахырдан тәрбиячеләр үзләренең әлеге көнгә багышлап язган шигырьләрен, багышламаларын сөйләделәр.

«Татар – информ» МА материаллары буенча

БАРЛЫК ЯҢАЛЫКЛАРНЫ УКУ