КДАУ – үзгәртеп кору таләп итүче нәтиҗәсез вузлар исемлегендә

Мәсәкүдә дәүләт мәгариф учреждениеләре эше нәтиҗәсенә бәя бирү һәм нәтиҗәсез дәүләт учреждениеләрен үзгәртеп кору максатыннан, аларның эшчәнлегенә мониторинг уздыру буенча ведомствоара комиссиянең йомгак ясау утырышы булды. Бу хакта Россия Мәгариф һәм фән министрлыгы рәсми сайтында хәбәр ителә.
“Эшчәнлегенең үзенчәлегенә бәйле нәтиҗәсезлек сыйфатларына ия булган мәгариф учреждениесе” төркемендәге мәгариф учреждениеләре исемлегенә 3 Казан филиалы кергән:
1. “Идел буе дәүләт су транспорты академиясе”нең Казан филиалы;
2. “Мәскәү дәүләт хәбәр бирү юллары университеты”ның Казан филиалы;
3. “Идел буе дәүләт телекоммуникация һәм информатика университеты”ның Казан филиалы;
“Эшчәнлеген оптимальләштерүгә мохтаҗ мәгариф учреждениесе” төркеменә Казан дәүләт энергетика университеты һәм ТР “А.Н.Туполев исемендәге Казан милли тикшеренү техника университеты-КАИ”ның 8 филиалы: Әлмәт, Бөгелмә, Алабуга, Яшел Үзән, Лениногорск, Яр Чаллы, Түбән Кама, “Восток” Чистай филиаллары керде.
Нәтиҗәсез булган һәм үзгәретеп коруны таләп итә торган вузлар исемлегенә Казан дәүләт аграр университеты һәм 2 филиал керде:
1. “А.Н.Туполев исемендәге Казан милли тикшеренү техника университеты-КАИ”ның Бөгелмә филиалы;
2. “А.Н. Добролюбов исемендәге Түбән Новгород дәүләт лингвистика университеты” ның Казан филиалы.
Утырыш беркетмәсе нигезендә, эшчәнлеген оптимальләштерүгә мохтаҗ мәгариф учреждениеләренә РФ субъектлары белән бергә үсеш программаларын эшләргә һәм 2012 нче елның 15 нче декабренә кадәр башкарма хакимиятнең федераль органнарына тапшырырга йөкләнелгән.
Башкарма хакимиятнең федераль органнарына РФ субъектларының башкарма хакимияте органнары белән бергә нәтиҗәсез булган һәм үзгәртеп кору таләп ителгәннәр төркеменә кергән мәгариф учреждениеләренә үзгәртеп кору буенча тәкъдимнәрне 2012 нче елның 22 декабренә кадәр бирергә йөкләнелгән.