Өй дигән бакча

Арча районында сабыйларны бакчага урнаштыруның яңа юлын эзләп тапканнар. Арчада бүген барлыгы 8 гаилә бакчасы эшли.
Аларның 5ен авылда, калганнарын шәһәр үзәгендә урнашкан гаиләләр булдырган. Анда 3тән 6 сабыйга кадәр йөри. Норматив буенча бер балага 2,5 квадрат метр мәйдан туры килергә тиеш икән. “Һәрбер бакча райондагы гади балалар бакчасына беркетелгән. Туклану өчен кирәк-яраклар, уенчыклар, җиһазлар белән шул мәктәпкәчә учреждение тәэмин итеп тора. Ризыкны тәрбияче яки аның ярдәмчесе гаилә бакчасына алып килә. Көн тәртибе, укыту программасы гади балалар бакчасыннан аерылмый”, – ди Арча мәгариф бүлегенең мәктәпкәчә белем бирү методисты Диана Мусина.
Гаилә балалар бакчасында тәрбияче булып кемнәр эшли ала? Тәрбияче вазыйфасына оештыручы үзе билгеләнергә мөмкин. Шулай ук күп балалы ана үз сабыйларын, башка балаларны да өй бакчасында тәрбияли ала. Тәрбияченең югары педагогик белеме булуы мәҗбүри түгел, мәгариф бүлеге тәрбиячеләргә өстәмә курслар оештыра. Мәгариф бүлегендә эшләүче методист уку процессын күзәтә һәм тәрбиячеләргә үзенең киңәшләрен бирә. Гаилә балалар бакчасының уңай яклары шактый, мәсәлән, бакчаны үз өендә оештырган кеше коммуналь хезмәтләрне түләгәндә ташламаларга ия була.
“Сабыйларга мондый балалар бакчасы бик ошый, ата-аналар дәгъва белдермиләр, киресенчә, алар шәһәрдә гаилә балалар бакчасы булуына чиксез шат, газизләрен анда бик теләп йөртәләр. Мин балаларны бик яратам, үзем­нең балаларыма да тәрбияче хезмәтен күрсәтәм. Эш сәгате иртәнге 8дән башланып, кичке 4кә кадәр дәвам итә”, – дип сөйли Арчадагы 8нче балалар бакчасына тер­кәлгән гаилә балалар бакчасын оештыручы Гөлназ Гарифуллина.