Казан лицеисты Балтыйк халыкара олимпиадасының көмеш медален яулады

22 май 2020 ел., җомга

Казанның Вахитов районындагы 131-нче лицей укучысы Ян Шнейдман Балтыйк халыкара олимпиадасының көмеш медаленә лаек булды. Интеллектуаль ярыш нәтиҗәләре буенча (быел беренче тапкыр дистанцион форматта узды) Россия җыелмасы гомуми команда медаль зачетында икенче урынны алды.

Олимпиадада Россия укучылары ике алтын һәм дүрт көмеш медаль яулады. Березники шәһәреннән Матвей Князев һәм Мәскәүдән Данил Самоделкин алтын медальләргә ия булдылар. Комидан Денис Рубцов, Пермьнән Ольга Хронусова, Мәскәүдән Даниил Рынкевич һәм Казаннан Ян Шнейдман көмеш медальләр белән бүләкләнде.

Интеллектуаль ярыш нәтиҗәләре буенча беренче урынны Румыния җыелма командасы алды. Олимпиадада дөньяның 12 иленнән 109 укучы катнашты, дип хәбәр итә ТР Мәгариф һәм фән министрлыгы матбугат хезмәте.

Физика буенча Балтыйк олимпиадасы ел саен Эстония, Финляндия, Латвия һәм Швециянең мәктәп укучылары өчен үткәрелә. Россия укучылары өчен олимпиадада катнашу - 51-нче Халыкара физика олимпиадасына әзерләнү мөмкинлеге.

ЯҢАЛЫКЛАРГА ЯЗЫЛУ
Сайттагы барлык материаллар лицензия буенча тәкъдим ителә:
Creative Commons Attribution 4.0 International
Яндекс цитирования