Мәктәпләрдә мантыйк һәм турникетларны тыйганнар

Мәктәпләрдә акча җыюга каршы көрәшү максатыннан ачылган “кайнар линия” нәтиҗәләре буенча Татарстанда ике кеше (укытучы һәм мәктәп директоры) җәзага тартылган. Калган шикаятьләр йә расланмаган, йә тикшерелә.
Искәртеп узабыз, ноябрь башында Татарстан Мәгариф һәм фән министрлыгы ата-аналар өчен “ышаныч телефоны” ачты, алар аңа шалтыратып, уку йортларында акча таләп итү фактлары турында хәбәр җиткерә ала. Беренче айда ата-аналар “кайнар линия”гә - 61, узган елның 10 декабреннән бу атна башына кадәр нибары 17 тапкыр шалтыраткан. Дөрес, бу темага тагын 11 мөрәҗәгать министрлыкка язма рәвештә килгән. Күрәсең, “кайнар линия” берникадәр суынгандыр...
Татарстан Мәгариф һәм фән министрлыгыннан хәбәр итүләренчә, ата-аналардан килгән шикаятьләрнең күбесе – Казаннан. Шулай ук Чаллы, Түбән Камадан, Биектау һәм Буа районнарыннан да бар. Әйтик, Чаллының 73 нче балалар бакчасы һәм Казанның 75 һәм 18 нче мәктәпләре, 18 һәм 122 нче гимназияләре, шулай ук 160 нчы балалар бакчасында тәрбияләнүчеләрнең ата-аналары хәйрия фондларына мәҗбүри акча җыюларына зарланган. Өстәвенә, соңгы ике учреждениедә акча җыю турында хәбәрләр министрлыкка элегрәк тә килгән булган. Ата-аналар каравылчыларга, ремонтка, яңа җиһазга, укытучыларга һәм тәрбиячеләргә бүләк, уенчыклар, хуҗалык кирәк-яраклары – сабын, бәдрәф кәгазе алу өчен акча җыярга мәҗбүр итүләренә зарланган. Хәзерге вакытта әлеге шалтыратулар буенча тикшерүләр үткәрелә.
Гражданнарның мәҗбүри акча җыюга бәйле 11 гаризасы тикшерелгән һәм аларның 10 сы нигезсез дип табылган. Әйтик, исемен атарга теләмәгән чыганак Казанның 402 нче балалар бакчасында ремонтка акча җыюлары турында әйткән. Урынга барып тикшерү нәтиҗәсендә ремонтның бер предприятие хисабына ясалуы ачыкланган. Дөрес, бакча администрациясе 2013 елда иганәчегә чыгымнарны компенсацияләргә ышандырган.
Минзәлә районының Матвеево мәктәбендә укучылар өчен концертка мәҗбүри акча җыюлары турында сигнал булган, өстәвенә, укытучылардан. Тик министрлык үткәргән тикшерү вакытында мәдәни чараларның педагоглар коллективы карары белән үткәрелүе ачыкланган һәм укытучылар 200 сумны үз теләкләре белән җыйган.
Казанның 6 нчы гимназиясендә укучыларның әти-әниләре “Әйләнә-тирә мохит” дәреслеген сатып алу өчен үзләреннән акча таләп итүләренә зарланган. Бушлай китаплар узган ел алардан файдаланган сыйныфның дәреслекләрне мәктәп китапханәсенә вакытында кайтарып бирмәве аркасында җитмәгән икән. Тикшерүдән соң укучыларга бушлай китаплар таратканнар, ә тоткарлык ясауда гаепле укытучыга шелтә белдерелгән.
Казанның аерым фәннәрне тирәнтен өйрәтүче 135 нче мәктәбендә белем алучы икенче сыйныф укучысының әнисе ни өчен мантыйк дәресләре өчен түләттерәләр дип кызыксынган. ТР Мәгариф һәм фән министрлыгы инспекторлары ачыклаганча, әлеге мәктәптә “мантыйк” укыту өчен мәҗбүри фәннәр исемлегенә керми, димәк, түләүле белем бирү хезмәте булып тора. Әлеге хезмәтне күрсәтү буенча ата-аналар белән килешүләр булганлыктан, бу яктан мәктәпкә дәгъвалар юк. Әмма мантыйк фәнен мәктәптә законсыз, тиешле лицензияләре булмаган килеш укытканнар. Нәтиҗәдә, фәнне тыйганнар, ата-аналар белән килешүләрне гамәлдән чыгарганнар, ә акчаларын кире кайтарганнар...
Алабуганың 4 нче гимназиясендә белем алучыларның ата-аналары хәбәр иткән фактлар гына тулысынча расланган...
- Мәктәп администрациясе милек хуҗаларының рөхсәтен сорап-нитеп тормыйча, керә торган урында автомат турникетлар һәм ашханәдә тукланган өчен түләргә терминаллар куйган, - дип хәбәр итте Алабуга прокуроры ярдәмчесе Рөстәм Саттаров. - Шуннан соң ата-аналар балалар мәктәпкә керә һәм төшке ашка түли алсын өчен, үз хисапларына электрон пластик карточкалар ясатырга мәҗбүр булган. Мәктәптә мәҗбүри акча җыю факты буенча без мәгариф идарәсе адресына тәкъдимнамә юлладык, ә үз белдекләре белән турникетлар һәм терминал урнаштырган өчен, директорга карата ТР Административ хокук бозулар кодексының җирле үзидарә органы рөхсәтеннән башка муниципаль милектәге торак булмаган фонд объекты белән идарә итү маддәсе буенча беркетмә төзелгән. Моның өчен вазифаи зат 4 тән 5 мең сумга кадәр штрафка тартылырга мөмкин.
Дөрес, Саттаров сүзләренчә, әлегә турникет һәм терминалларны сүтмәскә булганнар. Гимназия якын арада законлаштырса һәм пластик карточкаларга түләр өчен акча тапса, электрон керү һәм тукланган өчен түләү системасы янә гамәлдә булачак. Начар эш түгел бит!
Татарстан Мәгариф һәм фән министрлыгының “кайнар линия” телефоны (843) 292-80-46 эш көннәрендә 10.00-17.00 сәгатьләрдә эшли.