М. Вахитов исемендәге гимназиядә укучылар дәресләрдән тыш та инглизчә сөйләшергә өйрәнәләр

Мәсәлән, әлеге тел декадалары кысаларында ункөнлек дәвамында һәр балага бирем бирелә. Алар инглиз телле илләр турында дивар газетасы чыгаруда, концертларда, күңелле сәяхәтләрдә, викториналарда, җыр һәм шигырь конкурсларында, уеннарда катнашалар. Кичәләр уздырганда балаларның яшь үзенчәлекләре исәпкә алына. “Зәгыйфь звено”, “Нәрсә? Кайда? Кайчан?”, “Брейн-ринг” кебек уеннар һәр төркем яшьтәгеләр күңеленә хуш килә. “Раштуа” “Хэллоуин”, “Изге Вәли көне” кебек сыйныфтан тыш чаралар да балаларның зур активлыгы белән үтә.
Ел саен Америкадан килгән студентлар укучыларның өйләрендә берничә көн кунак булалар. Бу үзара дуслыкны арттыруга ярдәм итә. Телне яхшы өйрәнү өчен, интерактив такталар, проекторлар, ноутбуклар җитәрлек. Районда лингафон кабинеты да бар.
Укучыларның олимпиадаларда җиңүләре аларның әлеге фәнне тирән үзләштерүләре турында ачык сөйли. Быел 9 сыйныф укучысы Зилә Йосыпова инглиз теле буенча район олимпиадасында җиңүче булды. Ильяс Габитов “Яшь лингвист” республика интеллектуаль конкурсында, Ильяс Сәетморатов Бөтенроссия дистанция олимпиадасында яхшы нәтиҗәләр күрсәттеләр. Укучылар ел саен халыкара конкурсларда катнашып, призлы урыннар яулап киләләр. Узган уку елында Азилә Йосыпова белән Айдар Вәлиев инша язу буенча халыкара конкурс призерлары булдылар. Айдарны чит илгә укырга чакырдылар.