Икенче буын стандартларга күчү шартларында татар теле һәм әдәбияты укытуның актуаль мәсьәләләре: теория, инновация, практика һәм технологияләр

2013 нче елның 15 нче мартында Татарстан Республикасы Мәгариф һәм фән министрлыгы Казан (Идел буе) федераль университеты белән берлектә Балтач районы башкарма комитетының мәгариф идарәсе муниципаль бюджет гомуми белем учреждениесе «Салавыч урта гомуми белем бирү мәктәбе»ндә «Икенче буын стандартларга күчү шартларында татар теле һәм әдәбияты укытуның актуаль мәсьәләләре: теория, инновация, практика һәм технологияләр» дигән темага семинар уздырылды. Балтач районы башкарма комитеты җитәкчесе урынбасары Вакыйф Зәкиев семинарга килгән галимнәрне һәм17 районнан килгән татар, мари, удмурт, теле һәм әдәбияты укытучыларын җылы сәламләде.
Ана теле һәм әдәбияты укытучылары алдында дәреслек авторлары- Казан федераль университетының татар телен укыту методикасы кафедрасы җитәкчесе, педагогика фәннәре докторы Фираз Харисов, Казан федераль университеты профессоры, педагогика фәннәре докторы Чулпан Харисова татар теле һәм әдәбияты укытуның актуаль мәсьәләләре буенча чыгыш ясадылар. Укытучылар ФДДБС кысаларында чыккан китап авторлары Илсөяр Мияссаровага, Г.М.Сафиуллинага, Ә.Г.Мөхәммәтҗановага М.Я.Гарифуллиналарга үзләрен борчыган сорауларны бирделәр. Удмуртия Республикасынның укытучыларның белемен күтәрү институты укытучысы Клементиев А.А., удмурт балаларының удмурт һәм татар телләрен белү дәрәҗәсе белән канәгать булуын белдерде һәм, хезмәттәшлекне дәвам иттерүне теләп, удмурт теле укытучыларын Ижевск шәһәренә конференциягә чакырды.
Семинарда ФДББС кысаларында мари, удмурт, рус, чуваш, мордва балаларына татар телен укыту проблемасы, гамәлдә булган дәреслекләр турында сөйләшенде. Эшлекле семинар оешкан төстә узды. «Дәрестә рефлексия», «ФДББС кысаларында рус телендә белем бирүче мәктәптә татар телен укыту үзенчәлекләре»,«Удмурт балаларына мәктәптә татар телен укыту үзенчәлекләре », «Мари милләтеннән булган укучыларга татар телен укытуның актуаль мәсьәләләре» дигән темаларга осталык дәресләре үткәрелде. Галимнәр мәктәптә алып барыла торган уку- укыту, методик -практик юнәлешне югары бәяләделәр һәм татар телен үзләштерүне камилләштерү өлкәсендә үзләренең тәкъдимнәрен керттеләр.