Бөгелмәдә «Ел тәрбиячесе-2021» конкурсының зона этабы узды
«Ел тәрбиячесе-2021» республика һөнәри конкурсының зона этабы башланды, анда мәктәпкәчә мәгариф оешмалары педагоглары катнаша.
8, 9 февральдә конкурс чаралары Бөгелмә муниципаль районының 14 нче «Журавушка» прогимназия базасында узды. Үз һөнәри осталыкларын Азнакай, Әлмәт, Баулы, Бөгелмә, Ютазы, Лениногорск районнарыннан 18 тәрбияче күрсәтте. Конкурс ике номинациядә үткәрелә: «Ел тәрбиячесе» һәм «Туган телдә тәрбия һәм белем бирү төркеме тәрбиячесе». Конкурсның зона этаплары 8 муниципаль районның мәктәпкәчә мәгариф оешмалары базасында узачак.
Зона турларында конкурсның муниципаль этаплары җиңүчеләре һәм призерлары катнаша – бу 132 педагог. Зона этабы 3 мартта тәмамланачак. Аның нәтиҗәләре буенча конкурсның республика этабында катнашачак 30 финалисты билгеләнәчәк. Ул Казанда 5-9 апрель көннәрендә узачак.