“2013 нче елда ТРның иң яхшы укытучысы” конкурсы республика этабы тантаналы шартларда башланды

Казанның 39 нчы мәктәбендә 22 апрельдә “Татарстан Республикасының иң яхшы 2013 нче ел укытучысы” конкурсының республика этабы тантаналы шартларда башланып китте. Әлеге бәйгене ТР Мәгариф һәм фән министрлыгы “Мәгариф” илкүләм өстенлекле проекты кысаларында оештыра.
ТР Мәгариф һәм фән министрының беренче урынбасары Данил Мостафин сүзләренә караганда, конкурсның бу өлешендә укытучыларның максаты – үз-үзләрен күрсәтү түгел, ә белем бирү системасында җыелган проблемаларны ачыктан-ачык күрсәтү. “Без көн саен укытучыларның потенциалын көндәлек үстерергә тиеш. Монда җиңеп чыккан укытучы республиканың педагоглар коллективы йөзе булып, Татарстанны сентябрь аенда узачак бөтенроссия конкурсында тәкъдим итәчәк”, - диде урынбасар.
Республика бәйгесендә катнашучылар 39 нчы мәктәптә 4 көн дәвамында дәресләр, остаз мәктәпләре, сыйныф сәгатьләре һәм ата-аналар җыелышлары үткәрәчәк.
Тантаналы ачылыш вакытында бәйгедә катнашучыларга “2013 нче елда Татарстан Республикасының иң яхшы укытучысы” бәйгесендә абсолют җиңүче булган Казан шәһәренең 111 мәктәбендә рус теле һәм әдәбияты укытучы Николай Токранов изге теләкләрен җиткерде. Аның фикеренчә, иң мөһиме – кәефнең күтәренке булуы. “Сезне сынаулар һәм ярышлар түгел, ә бәйрәм көтә. Бу – акыл, үз эшеңнең остасы булу һәм намуслылык бәйрәме, ә бәйге бәйге – ул бары тик бу сыйфатларны ачып салу өчен бирелгән мөмкинлек”, - диде ул.