Ата-аналардан акча җыючы мәктәп директорларына катгый җәза бирелергә тиеш – ТР мәгариф һәм фән министры

Казанда ТР мәгариф һәм фән министры Энгель Фәттахов җитәкчелегендә мәгариф учреждениеләрендә ата-аналардан акча җыю очраклары арту белән бәйле киңәшмә узды.
Киңәшмәдә ТР мәгариф һәм фән министры урынбасары – министрлыкның мәгариф өлкәсендә Күзәтчелек һәм контроль департаменты җитәкчесе Равил Хәмитов, Казан мәгариф идарәсе җитәкчесе Илсур Һадиуллин, Казан шәһәре методика үзәге директоры Роза Шәяхмәтова, РФ Тикшерү комитетының ТР буенча идарәсенең процессуаль контроль бүлеге җитәкчесе Марат Мәхмүтов, ТР буенча Тикшерү җитәкчесенең өлкән ярдәмчесе, юстиция полковнигы Илшат Гатиев, Казан хокук саклау үзәге Совет рәисе Игорь Шолохов һ.б. катнашты.
ТР мәгариф һәм фән министры урынбасары Равил Хәмитов мәгариф учреждениеләрендә законсыз рәвештә акча җыюга кагылышлы берничә актуаль теманы билгеләде. Алар – эш дәфтәрләренә, сыйныф фондына, учреждениене саклауга, сыйныфны җыештырганга акча җыю, шулай ук 1 сыйныфка кабул иткәндә акча күчерү.
“2012 елның 8 ноябреннән башлап “Электрон Хөкүмәт” системасы аша 55, ТР Мәгариф һәм фән министрлыгының кайнар линиясе аша 82, Казан хокук саклау үзәгеннән 24 мөрәҗәгать алынды. Шулай ук ММЧ нан шундый мәгълүмат килә, диде министр урынбасары. – Мәктәпләргә барып 55 мөрәҗәгатьнең 26 сы каралды, 9 очракта фактлар тулысынча расланды, 11 мәктәптә – өлешчә”.
Р.Хәмитов сүзләренә караганда, акча җыю проблемасы ата-аналар комитеты аша эш итүдән гыйбарәт. “Ата-аналар комитеты әгъзалары “ник акча тапшырмадыгыз?” кебек SMS-хәбәр җибәреп басым ясау очраклары бар, - дип билгеләп үтте ул. Күп очракта акча тапшыру срогы куелган була.
Кайбер вәзгыятләр буенча фикер алышканда, эш дәфтәрләре өчен акча җыю мәсьәләсе каралды.
“Мәктәпләр билгеле, шуңа күрә җитәкчелек итүче затларны эштән азат итү турында сүз кузгатырга кирәк, - дип ассызыклады министр. – Мисал чен, балалар бакчаларына электрон чиратны бозучылар эштән азат ителде инде”. Энгель Фәттахов хокук саклау органнары вәкилләренә мөрәҗәгать итеп, аларны катгый булырга чакырды. “Без ай саен гражданнарның акча җыю буенча җибәрелгән мрәҗәгатьләрен җибәреп торачакбыз”, - диде министр.
Э.Фәттахов сүзләренә караганда, киләсе уку елында дәреслекләр белән проблема булмаячак. Казан шәһәре методика үзәге директоры Р.Шәяхмәтова Татарстан мәгариф учреждениеләренә эш дәфтәрләре сатып алмау тәкъдиме белән чыкты, чөнки алар укучыларны дәреслекләргә бәйле итә, дип аңлатып үтте ул.
Министр бу мәсьәлә буенча фикер алышуга нәтиҗә ясады һәм 2013-2014 еллар уку чорына Татарстан мәктәпләрендә белем алучы 1-3 сыйныф укучылары дәреслекләр һәм Петерсон эш дәфтәрләре белән тәэмин ителәчәк дип белдерде. “Эш дәфтәрләренә бернинди акча җыю очраклары булырга тиеш түгел”, - дип тәмамлады ул.