Укучыларның ата-аналарын зур күләмдә акча түләргә мәҗбүр итү - әхлаксызлык - ТР Мәгариф һәм фән министры

Казанда ТР Мәгариф һәм фән министрлыгында мәгариф учреждениеләрендә ата-аналардан акча җыю очраклары арту белән бәйле киңәшмә узды.
Ата-аналардан мәктәпне саклау өчен акча җыю мәсьәләсе буенча фикер алыштылар. ТР Мәгариф һәм фән министры урынбасары – министрлыкның мәгариф өлкәсендә Күзәтчелек һәм контроль департаменты җитәкчесе Равил Хәмитов сүзләренә караганда, юридик яктан аны хәйрия фонды, мәктәп һәм шәхси сак предприятиесе белән өчьяклы килешү төзеп хәл итәргә мөмкин. Акча күчерү икенче мәьәлә булып тора. Киңәшмәдә акча җыюны бетерү алымы буларак учреждениеләрне көндез саклау өчен акча алуны туктату тәкъдим ителде.
Сыйныф бүлмәләрен җыештыру өчен акча җыю бәхәс чыгарды. Казан хокук саклау үзәге Совет рәисе Игорь Шолохов фикеренә караганда, сыйныфны балалар җыештырырга тиеш түгел.
“Балаларны мәгариф программасында каралмаган хезмәткә җәлеп итү тыела. Шуңа күрә мәктәп директорларына мәгариф программасына “Хезмәткә трбияләү” бүлеген кертү зарур”, - дип тәкъдим итте Р.Хәмитов. Аның сүзләренә караганда, ата-аналар бу программа белән танышырга тиеш.
Энгель Фәттахов проблемаларны хәл итү буенча тәкъдимнәрне тыңлагач, бу мәсьәләләр җентекләп өйрәнүне таләп итә дип белдерде. ТР Мәгариф һәм фән министры киңәшмәне тәмамлап, укучыларның ата-аналарын зур күләмдә акча түләргә мәҗбүр итү - әхлаксызлык, дип белдерде.