Рособрнадзор барлык муниципалитетларда белем бирү сыйфатын бәяләячәк
Рособрнадзор 2021 ел ахырына илнең барлык муниципалитетларында белем бирү сыйфатын бәяләячәк, дип хәбәр итте ведомство җитәкчесе Анзор Музаев.
- Ел ахырына без РФнең барлык муниципалитетларын да бәялибез. Һәр губернатор яки республика башлыгы бер клик ясый һәм аның проблемаларының кайсы муниципалитетта булуын картада күрә алачак. Бу проблемаларны ачыкларга һәм хәл итәргә тиешле идарәчеләрне бәяләү, - дип белдерде ул.
Анзор Музаев сүзләренә караганда, идарәчеләр муниципалитетта белем бирүнең түбән сыйфатлы булуының сәбәбен ачыкларга тиеш: педагогик состав, матди-техник база җитәрлек булмау, идарәдәге проблемалар яки башка төрле проблемалар.
Ул билгеләп үткәнчә, муниципалитетлар һәм мәктәпләр эшенең нәтиҗәлелеген бары тик урта баллар буенча гына бәяләргә ярамый. Объектив булу мөһим.
- Без моның мәктәп директорлары яки укытучылар өчен корбаннар эзләүгә әверелүен теләмибез. Болай булырга тиеш түгел: корбан табылган, җәза бирелгән, барысы да хисап биргән, тынычланган, ә балалар яхшы белем алмаган, - дип ассызыклады Анзор Музаев.
Рособрнадзор җитәкчесе шулай ук мәктәпләрдә контроль һәм тикшерү эшләре санын оптимальләштерү эше турында сөйләде. "Кайбер мәктәпләрнең ВПР тапшыруга өч әзерлек эше бар. Тагын муниципаль да, төбәк контроль органнары да бар. Моннан укытучыларга артык йөкләнеш туа һәм, нәтиҗә буларак, канәгатьсезлек барлыкка килә. Без укытучыларның нәрсәгә зарлануын һәм аларның административ йөкләнеш дип исәпләүләрен анализлаганда, 35% төрле дәрәҗәләрдән төшерелгән контроль эшләрне атады. Безнең ВПРга йөз тотыгыз һәм өстәмә үлчәүләр үткәрмәгез. Боларның барысын да тәртипкә китерегез", - диде Анзор Музаев.
Ул муниципаль мәгариф идарәсе органнары җитәкчеләреннән барлык мәктәпләрдә дә төрле контроль эшләр башкаруга нинди процент вакыт туры килүенә анализ ясауларын һәм яңа уку елы башына кадәр уку планнарына төзәтмәләр кертүне сорады.