ЯҢАЛЫКЛАР
XI сыйныфларда бердәм республика имтиханының (БРИ — 2016) һәм IX сыйныфларда дәүләт йомгаклау аттестациясе кысаларындагы төп дәүләт имтиханының (ДЙА — 2016, ТДИ — 2016) ТР Мәгариф һәм фән министрлыгы тарафыннан тәкъдим ителгән үрнәк контроль-бәяләү материаллары (күрсәтмә вариант (демоверсия), кодификатор, классификация) сайтка урнаштырылды.
Бүген Татарстан Республикасы Президенты Рөстәм Миңнеханов А. П. Обыденнов исемендәге Казан автотранспорт техникумы базасындагы ресурс үзәгендә булды. Аны ТР Президенты Аппараты җитәкчесе Әсгать Сәфәров, Казан шәһәре мэры Илсур Метшин, ТР Премьер-министры урынбасары – мәгариф һәм фән министры Энгель Фәттахов, ТР Президентының социаль мәсьәләләр буенча ярдәмчесе Ләйлә Фазлыева һәм башка рәсми затлар озатып йөрде.
“Экологик үсеш – Evolution Awards 2016” бөтенроссия премиясенә дәгъва гаризалары кабул ителә. Премия Россия Федерациясе территориясендә тотрыклы үсешнең экологик аспектлары һәм “яшел” технологияләрне үстерү һәм куллану өлкәләрендәге казанышлар өчен биреләчәк (“яшел” технологияләр дип ресурс саклый торган технологияләр һәм табигый ресурсларны яңадан торгызу технологияләре атала). Конкурс комиссиясен Россия табигый байлыклар һәм экология министры Сергей Донской җитәкләячәк.
Интернетта яңа “Әлбәттә” мәгариф проекты барлыкка килде. “Әлбәттә” — татар фәнен киң аудиториягә ирештерү максаты белән башлап җибәрелгән фәнни-популяр проект, дип аңлатыла әлеге сайтта.
Аның кысаларында хәзерге көн күренекле татар галимнәренең татар халкы тарихы, тел белеме, әдәбияты, сәнгате һәм фольклорына кагылышлы кыска видеолекцияләре тәкъдим ителәчәк.
Бүген Казан мэры Илсур Метшин “Казан шәһәренең иң яхшы укытучысы-2016” конкурсы җиңүчеләрен бүләкләде. Казан ратушасында уздырылган тантанада ТР Президенты ярдәмчесе Ләйлә Фазлыева, ТР Премьер-министры урынбасары-ТР мәгариф һәм фән министры Энгель Фәттахов, Казан шәһәре Башкарма комитеты җитәкчесенең социаль мәсьәләләр буенча урынбасары Наталья Гречанникова, комитетның мәгариф идарәсе җитәкчесе Илсур Һадиуллин һ.б. рәсми затлар катнашты.
ТР Яшьләр эшләре һәм спорт министрлыгында Лобачевский исемендәге премиягә дәгъва кылган фәнни хезмәтләр конкурсы җиңүчеләрен бүләкләү тантанасы булды.
КФУ, бөек татар шагыйре Габдулла Тукайның (1886-1913) тууына 130 ел тулуга багышлап, урта белем бирү оешмаларының 7-11нче сыйныф укучылары арасында “Аны халык бик яшьләй үз шагыйре итеп таныды...” Бөтенроссия шигырь укучылар конкурсы үткәрә. Чара Габдулла Тукай иҗатын популярлаштыруны, яшь буынны татар шигъриятенә, милли мәдәният кыйммәтләренә җәлеп итү, аларда туган илгә карата мәхәббәт тәрбияләүне максат итә.
Интернетта яңа “Әлбәттә” мәгариф проекты барлыкка килде. “Әлбәттә” — татар фәнен киң аудиториягә ирештерү максаты белән башлап җибәрелгән фәнни-популяр проект, дип аңлатыла әлеге сайтта.
Татарстан Президенты кичә “ТНВ” телеканалында “Рөстәм Миңнеханов белән биш кич” программасының бишенче чыгарылышында, киләчәк белемле кешеләр кулында, дип билгеләп үтте һәм урта белем дәрәҗәсен күтәрергә кирәклеген ассызыклады.
Финляндиянең Тампер шәһәрендәге Татар милли җәмгыяте татарларны өйрәнү белән шөгыльләнүче студент-бакалаврлар һәм магистрлар өчен Мәрҗани стипендиясенә конкурс игълан итте, дип хәбәр итә Бөтендөнья татар яшьләре форумы. Конкурс бөтен дөнья студентлары өчен ачык, әмма Татарстанга аерым игътибар бирелә. Төп максат – татар тарихын, телен һәм әдәбиятын халыкара дәрәҗәдә өйрәнүгә этәргеч бирү.
Стипендиягә дәгъва кылучылар татарларны өйрәнүнең теләсә кайсы өлкәсендә, шул исәптән тарих, филология, социология, антропология һ.б. буенча башкарылган тикшеренү проектын тәкъдим итә ала. Проект студентның архив һәм кыр эшләре алып баруын, конференцияләрдә, җәйге мәктәпләрдә, экспедицияләрдә һәм Россиядә, чит илләрдә үткәрелгән башка фәнни чараларда катнашуын чагылдырырга тиеш.