ЯҢАЛЫКЛАР

26 апрель көнне Казанда  63-нче апрель җиңел атлетика эстафетасы узды. Эстафетада югары уку йортлары, урта һөнәри белем бирү оешмалары студентлары катнашты.

2015 елның 26 апрелендә Балык бистәсенең “Дельфин” спорт-сәламәтләндерү комплексында Татарстан Республикасы мәктәп укучылары арасында судомоделизм буенча ярышлар узды. Ярышларда республиканың 25 районыннан 130 укучы катнашты. 

Казанда “Сыерчыклар килде” акциясенә йомгак ясалды. Аның кысаларында балалардан меңнән артык сыерчык оясы һәм җимлек кабул ителде.

Бөек Ватан сугышында Җиңүнең 70 еллыгын бәйрәм итү кысаларында 9 май көнне Россиядә “Үлемсез полк” халыкара акциясе уздырыла. Анда 35 меңләп Татарстан укучысы һәм студенты катнашыр дип көтелә. Казанда әлеге акцияне Җиңү паркында үткәрү күздә тотыла. Акциянең асылы шунда ки, укучылар һәм студентлар кулларына ветераннар, тыл хезмәтчәннәре, концлагерь тоткыннарының фотоларын тотып, бер рәткә тезелеп басачак. Һәр сурәт астында герой турында мәгълүмат язылган була. Шул рәвешле, яшьләр бабаларының батырлыгы бүгенгәчә онытылмавын күрсәтәчәк.

Әлмәтнең Ризаэддин Фәхреддин исемендәге 1 нче гимназиясендә инглиз телен белүчеләр арасында “Drama Debate Festival” дигән I төбәк фестивале узды.

Татарстан Республикасы мәгариф һәм фән министрлыгы "Татарстан Республикасы ветераннары берләшмәсе" республикакүләм ветераннар җәмгыяте оешмасы белән берлектә "Россия ватанпәрварларын тәрбиялибез" Бөтенроссия конкурсының республика этабын үткәрде. Конкурсның финал этабына 500дән артык эш сайлап алынды. 

Бүген, 24 апрель көнне Казанда Идел буе спорт һәм туризм академиясендә мәктәп укучыларының  математика буенча Бөтенроссия олимпиадасының ачылу тантанасы узды. Казанга Россиянең 50 төбәгеннән 400 югары сыйныф укучысы белем буенча көч сынашырга килде.  Татарстан командасы бәйгенең төбәк турында югары күрсәткечләргә ирешкән 20 укучыдан тора.

Бүген Казанның М.Җәлил исемендәге Татар дәүләт опера һәм балет академия театрында татар теле һәм әдәбияты буенча III Халыкара олимпиада җиңүчеләрен бүләкләү тантанасы булды. Анда ТР Президенты вазифаларын вакытлыча башкаручы Рөстәм Миңнеханов, ТР Премьер-министры урынбасары – мәгариф һәм фән министры Энгель Фәттахов, ТР мәдәният министры Айрат Сибагатуллин, ТР Дәүләт Советы Рәисе урынбасары Римма Ратника, Бөтендөнья татар конгрессы Башкарма комитеты рәисе Ринат Закиров һ.б. катнашты.

2015 елның 24-26 маенда Мамадыш районында "Президент ярышлары" мәктәп укучыларының  Бөтенроссия спорт ярышлары региональ финалы уза. Ярышларда Әлки, Буа, Бөгелмә, Югары Ослан, Чистай, Биектау, Зәй, Нурлат, Саба, Мөслим, Кайбыч, Әлмәт, Лениногорск, Азнакай, Мамадыш районнарыннан җиденче сыйныф укучыларыннан торган 16 команда катнаша.