ЯҢАЛЫКЛАР

Казан (Идел буе) федераль университетының Лев Толстой исемендәге Филология һәм мәдәниятара багланышлар институты теләге булган һәркемне татар теле курсларына чакыра. Дәресләр атнасына 2 тапкыр 18.00дән 20.00гә кадәр уздырылачак. Курслар 28 сентябрьдән 18 декабрьгәчә оештырыла.

Чит ил теле буенча Бердәм дәүләт имтиханы 2022 елдан мәҗбүригә әйләнәчәк. Хәзерге вакытта чит ил телләрен укыту сыйфатын күтәрү программалары әзерләнә, дип хәбәр иткән РФ мәгариф һәм фән министры Дмитрий Ливанов.

2015 елның 1 августыннан 31 августына кадәрге вакыт аралыгында Татарстан Мәгариф һәм фән министрлыгының Мәгариф өлкәсендә күзәтчелек һәм контроль департаментына 40 мөрәҗәгать кабул ителде, шул исәптән 2 мөрәҗәгать ришвәтчелек очраклары турында.

Бүген Казанның Идел буе районы “Ферма-2” урамында 137 нче “Соловушка” муниципаль мәктәпкәчә белем бирү учреждениесе ачылды. 140 урынга исәпләнгән бакчаны ачу тантанасында мәртәбәле кунаклар – Татарстан Республикасы Президенты вазифаларын вакытлыча башкаручы Рөстәм Миңнеханов, РФ Президенты каршындагы Бала хокуклары буенча вәкаләтле Павел Астахов катнашты. Рәсми затларны ТР Премьер-министры урынбасары – мәгариф һәм фән министры Энгель Фәттахов, ТР төзелеш, архитектура һәм торак-коммуналь хуҗалык министры Ирек Фәйзуллин, ТР Президентының Социаль мәсьәләләр буенча ярдәмчесе Ләйлә Фазлыева, ТР да Бала хокуклары буенча вәкаләтле Гүзәл Удачина озатып йөрде.

Бүген 9нчы сыйныф укучыларына төп урта гомуми белем бирү программалары буенча дәүләт йомгаклау имтиханын яңадан тапшыру мөмкинлеге бирелә. Төп дәүләт имтиханын яңадан тапшыру хокукы имтиханны тапшырмаган яки 1дән артыграк мәҗбүри фәннән канәгатьләнерлек билге алмаган, яисә дәүләт йомгаклау аттестациясендә бу фәннәрнең берсе буенча икенче тапкыр канәгатьләнерлек нәтиҗәгә ирешмәгән 9нчы сыйныф укучыларына бирелә. ТР Дәүләт имтихан комиссиясе тарафыннан йомгаклау сынавын узу өчен өстәмә этапка республиканың 749 чыгарылышы уздырылган.

3-6 сентябрь көннәрендә Австрия башкаласы Венада Халыкара автомобиль федерациясенең (FIA) юл йөрү кагыйдәләрен өйрәнү һәм үтәү буенча балаларның XXX Европа белем бирү конкурсы уздырылды. Ярышларда 20дән артык Европа илләре вәкилләре катнашты. Анда Россия данын яшь юл инспекторларының “Безопасное колесо – 2015” бөтенроссия бәйгесендә иң яхшы нәтиҗәләргә ирешкән Татарстан Республикасы һәм Липецк өлкәсе командалары яклады.

Укытучылар көне уңаеннан, Татарстанның 26 укытучысына 200әр мең сум күләмендә премия тапшырылачак. Бу хакта Дмитрий Ливанов имзасы белән “Российская газета”да дөнья күргән РФ Мәгариф һәм фән министрлыгы боерыгында язылган.

Бүген Әлмәтнең "Дружба" микрорайонында 260 урынлы 4нче "Дружба" балалар бакчасы ачылды. Мәктәпкәчә белем бирү учреждениесен тантаналы ачуда ТР Президенты вазифаларын вакытлыча башкаручы Рөстәм Миңнеханов, Әлмәт муниципаль районы башкарма комитеты җитәкчесе Айрат Хәйруллин, "Татнефть" ГАҖ генераль директоры Наил Маганов һәм башкалар катнашты.

2 сентябрьдә Идел буе федераль округының Советлар Союзы Герое Гани Сафиуллин исемендәге Татарстан кадетлар корпусыннан 40 яшүсмер "Артек" лагерына "Идел буе кадетлары" уку-сәламәтләндерү җыенына китте.

4-24 сентябрьдә Анапа шәһәрендә “Смена” бөтенроссия балалар үзәгендә укучыларның “Президент ярышлары” спорт бәйгесенең бөтенроссия этабы уздырыла.