Бөтенроссия форумы кысаларында "Татар теле һәм әдәбиятын укытуга ирләрчә бер караш" дигән “түгәрәк өстәл” утырышы узды

Бүген Казанда туган тел укытучылары һәм укучылар катнашында Туган тел көненә багышланган бөтенроссия форумы узды. Аның эшендә ТР Мәгариф һәм фән министры Энгель Фәттахов катнашты.
Бөтен Россия буенча туган телләрне укытучылар, бәйгеләрдә һәм олимпиадаларда җиңү яулаган студентлар һәм мәктәп укучылары, фән һәм мәдәният әһелләре, ТР Халыклары ассамблеясе, Бөтендөнья татар конгрессы Башкарма комитеты вәкилләре Кәрим Тинчурин исемендәге театр бинасындагы тантанага җыелды.
Форум ТР Мәгариф һәм фән министрлыгы тарафыннан туган тел һәм әдәбияты укытучыларының алдынгы педагогик тәҗрибәсен гомумиләштерү, яшь буында туган телгә кызыксыну уяту максатыннан, берничә ел дәвамында оештырылып килә, дип хәбәр итте министрлык матбугат хезмәте.
Әлеге җыен кысаларында бүген ТР Дәүләт Советында беренче тапкыр ир-ат укытучылар катнашында "Татар теле һәм әдәбиятын укытуга ирләрчә бер караш" дип исемләнгән “түгәрәк өстәл” утырышы узды. Укытучыларны ТР Дәүләт Советы Рәисе урынбасары Римма Ратникова, ТР Мәгариф һәм фән министрлыгының белем бирү процессын укыту-методик әсбаблар белән тәэмин итү секторы җитәкчесе Әнисә Морозова сәламләде.
Вице-спикер билгеләп үткәнчә, Татарстан Республикасы мәктәпләрендә 4935 татар теле һәм әдәбияты укытучысы белем бирә. ТР Дәүләт Советы, милли сәясәт һәм федераль законнарга таянып, мәгариф үсешенә йогынты ясый торган законнар кабул итә. “Җәмгыятебезнең күпмилләтле булуы сәбәпле, һәркемгә ошарлык закон эшләү бик авыр”, - диде Римма Ратникова. Әмма парламент татар теленең статусын ныгыту өчен кулдан килгәннең барын да эшли.
Римма Ратникова сүзләренчә, татар телен укытуга демография белән бәйле вәзгыять тә зур йогынты ясый. Узган ел белән чагыштырганда, республика мәктәпләрендә укучылар саны 228 меңгә, татар балалары саны 42 процентка кимегән. “Әгәр 1998 елда 1129 татар мәктәбе булса, 2012 елда бары тик 854 кенә калды”, – дип белдерде вице-спикер.
Очрашу вакытында укытучылар татар теле һәм әдәбияты буенча программалар, белем бирү стандартлары, Бердәм дәүләт имтиханы формасындагы чыгарылыш имтиханнарын рус телендә тапшыру, татар телен өйрәтү методикаларын камилләштерү, рус телле балаларның татар телен өйрәнүгә кызыксынуы булмау һәм укытучыларның хезмәт хакы түбән булуга кагылышлы мәсьәләләрне күтәреп бәхәсләште, дип хәбәр итә ТР Дәүләт Советының Җәмәгатьчелек һәм массакүләм мәгълүмат чаралары белән элемтә бүлеге.
Туган тел буенча бәйге һәм олимпиадаларда җиңү яулаган өчен дипломнарны форум вакытында ТР Дәүләт Советының Мәдәният, фән, мәгариф һәм милли мәсьәләләр комитеты рәисе Разил Вәлиев, парламент депутаты Роберт Миңнуллин тапшырды. Форум кысаларында остаз мәктәпләре дә оештырылды.