Мәктәп формасын каян сатып алуны ата-аналар үзләре хәл итәргә тиеш – ТР Мәгариф һәм фән министрлыгы

Соңгы ике айда Татарстан Республикасы Мәгариф һәм фән министрлыгында ата-аналардан бердәм үрнәктә мәктәп формасы кертүгә бәйле яңалык буенча шикаятьләр саны артты.
Нигездә, ата-аналар уку учреждениеләре администрациясенең форма тегелергә тиешле ательены көчләп тагуы турында сүз кузгата. Бу хакта  Болгарда мәгариф идарәләре муниципаль органнары җитәкчеләре һәм мәгълүмат-методика үзәкләре директорлары эш киңәшмәсендәТР мәгариф һәм фән министры урынбасары Светлана Гиниатуллина белдерде.
Искәртеп узабыз, 1 сентябрьдән Россия территориясендә гомум белем бирү учреждениеләрендә укучылар өчен бердәм форма кертелә.
Республика дәрәҗәсендә мәктәп формасының гигиена һәм материалның куркынычсызлык таләпләренә туры килә торган критерияләр куела. Шулай ук бу карар кысаларында өч төрле форма (көндәлек, парад һәм спорт киеме) билгеләнәчәк.
Форманың төсе һәм фасоны мәктәп советы, ата-аналар комитеты, ата-аналар җыелышы тәкъдимнәре исәпкә алынып кабул ителә.
“Гражданнардан мәктәп формасы кертелү турындагы мөрәҗәгатьләр ешайды. Һәр икенче хатта мәктәп администрациясе нинди форма булырга тиешлеген һәм нинди ательедан аларга кирәклеген хәл иткәнлеге белдерелә. Мәктәп форманың бары тик фасонын, төсен генә билгеләвен искә төшерәм. Ә мәктәп формасын каян сатып алуны яки тектерүне ата-аналар үзләре хәл итәргә тиеш. Шуңа күрә тагын бер тапкыр мәгариф учреждениеләре җитәкчеләре белән очрашу үткәреп, бу мәсьәләгә басым ясау зарур. Бер урында сатып алырга яки тегәргә мәҗбүр итәргә ярамый. Шулай ук аз керемле гаиләләр мөмкинлекләрен дә исәпкә алу кирәк”, - дип ассызыклады Светлана Гиниатуллина.