Казанда иҗади урта һәм югары уку йортларының үзара хезмәттәшлеген үстерү турында фикер алышачаклар
Казан дәүләт мәдәният институтында Мәдәният һәм сәнгать өлкәсендә югары һәм урта һөнәри белем бирү оешмаларының «Төбәк палитрасы» фестивале уза.
Дүрт көнлек форум шулай ук «Музыкаль сәнгать», «Театр сәнгате», «Сынлы сәнгать», «Хореография сәнгате» һәм «Халык кәсепләре» юнәлешләре буенча югары һәм урта һөнәри белем бирүнең заманча тәҗрибәсен гамәлгә кертү мәсьәләләре буенча конструктив диалог оештырырга тиеш.
Фестиваль кысаларында «Музыка», «Театр», «Хореография», «Сынлы сәнгать», «Халык һөнәрләре» юнәлешләре буенча түгәрәк өстәлләр оештырылачак. Сәнгать өлкәсендә, шул исәптән компьютер технологияләрен кулланып, иҗатның яңа формалары буенча мастер-класслар узачак. Шулай ук мәдәният һәм сәнгать өлкәсендә һөнәри үсешнең төрле баскычларында һөнәри юнәлеш бирү эше буенча секция семинарлары оештырылачак.
«Төбәк палитрасы» фестивале 29 октябрьдә пленар утырыш белән төгәлләнәчәк, анда Урта һөнәри белем бирү оешмаларының белем бирү процессын камилләштерү буенча нәтиҗәләр ясалачак һәм тәкъдимнәр буенча фикер алышулар уздырылачак.