WorldSkills региональ чемпионатында 21 яңа компетенция барлыкка килде

2021 елның 15 ноябре, дүшәмбе

Татарстанда «Яшь профессионаллар» (WorldSkills Russia) төбәк чемпионаты ярышлары 257 компетенция буенча узачак. Быел 21 яңа компетенция барлыкка килде. Бу хакта ТР Мәгариф һәм фән министры Илсур Һадиуллин «Татар-информ» мәгълүмат агентлыгында узган матбугат конференциясендә хәбәр итте.

«Бу 16-22 яшьлекләр арасында 156 компетенция һәм 101 JuniorSkills компетенциясе», – дип сөйләде Мәгариф һәм фән министры.

Һадиуллин сүзләренә караганда, компетенцияләр саны елдан-ел арта бара. «Шуңа бәйле рәвештә WorldSkills стандартлары Урта һөнәри белем бирү системасында көннән – көн күбрәк кертелә, бу уку-укыту процессларын сыйфатлы яхшыртуга китерә», - дип билгеләп үтте ул.