Татарстан Республикасы мәгариф һәм фән министры Энгель Фәттаховның Халыкара балаларны яклау көне белән тәбрикләү

Сезне ихлас күңелдән гаҗәеп матур бәйрәм – Халыкара балаларны яклау көне белән тәбрик итәм!
Балаларны яклау, алар турында кайгырту бер бәйрәм көне белән генә чикләнмәвен барыбыз да аңлыйбыз. Балаларны бәхетле итү – гаиләсе һәм Ватанының киләчәген кайгыртучы кешеләрнең көндәлек хезмәт нәтиҗәсе ул.
Бала тәрбияләү – авыр һәм бик җаваплы эш. Иң олы хөрмәтемне бүген тормыш авырлыгын күргән, ата-ана назыннан мәхрүм булган, сәламәтлекләре чикләнгән балалар белән эшләүчеләргә белдерәсем килә. Бу балалар аерым игътибар таләп итә, алар безнең ярдәмгә мохтаҗ. Сез аларга күңел җылысын бирәсез, кайгыртасыз, ярату хисегезне бүләк итәсез – моның өчен зур рәхмәт сезгә!
Бүген Татарстанда сыйфатлы белем алу, рухи һәм физик үсеш алу өчен балаларга барлык шартлар да тудырылган. 2013 нче елда узачак Бөтендөнья җәйге Универсиада башлануга да санаулы көннәр калды. Казанда үтәчәк бу студент уеннары һәр гаиләдә спорт һәм сәламәт тормыш рәвешен үстерүгә зур этәргеч булыр дип ышанам.
Хөрмәтле олылар! Безнең балаларыбыз сау-сәламәт, тәрбияле, үз туган җирләрен яратучы, әти-әниләрен хөрмәт итүче, ярдәмчел һәм тәртипле булып үссеннәр өчен, әйдәгез, бөтен көчебезне куйыйк. Һәр баланың балачагы бәхетле булырга тиеш, һәм без моның өчен көчебезне кызганмыйк. Гаиләләрегезгә иминлек телим, балаларыгыз үз уңышлары һәм яулаган үрләре белән сезне гел сөендереп торсыннар.
Ә барлык балаларга – җәйге ялны күңелле һәм файдалы итеп үткәрүне, якты һәм көчле тәэсирләр белән баеп, яңа уку елын шатланып каршы алуны телим.