Рөстәм Миңнеханов мәктәп укучылары өчен эшмәкәрлек олимпиадасы ачылуын игълан итте
18 февральдә Татарстан Сәнәгать һәм сәүдә министрлыгы коллегиясендә Рөстәм Миңнеханов 9-11 сыйныф укучылары арасында Татарстан Президенты призына эшмәкәрлек олимпиадасы башлануы турында игълан итте. Республиканың иң яхшы яшь эшмәкәре өчен төп бүләк акча булачак.
Олимпиадада катнашучылар Business cats бизнес-симуляторын узарга тиеш була. Ул аналитика ясау дәрәҗәсе югары булган кандидатларның эшмәкәрлек сәләтен, аралашу һәм команда бирү күнекмәләрен ачыкларга мөмкинлек бирә. Президент олимпиадасында катнашучылар Татарстанның иң яхшы эшмәкәре исеме өчен көрәшәчәк.
Олимпиада дүрт этаптан тора. Беренче сайлап алу этабы 2022 елның 21 февраленнән 20 мартына кадәр дистанцион рәвештә уздырыла. Анда теләге булган һәркем катнаша ала.
Алга таба сайлап алу этабының ярымфиналы бара, ул районнар буенча сайлап алу этабында җиңүчеләр арасында 2022 елның 23 мартыннан 7 апреленә кадәр дистанцион рәвештә уздырыла. Киләсе этаплар Олимпиадада катнашучыларның махсус ассесмент-үзәктә булуын күздә тота.
Финал этабы «Алабуга» махсус икътисади зонасы территориясендә эшче белгечләр әзерли торган заманча үзәктә узачак. Республиканың иң яхшы эшмәкәрен Татарстан Президенты Рөстәм Миңнеханов билгеләячәк. Җиңүчеләр зур күләмдә акчалата приз, шулай ук «Алабуга Политех»ка имтиханнарсыз керү мөмкинлеген алачак.
Шулай итеп, җиңүчеләр һәм призерлар үзләренең эшмәкәрлек зирәклеге ярдәмендә зур күләмдә акчалата призлар эшли алачак.
Президент Олимпиадасында катнашу өчен сайлап алу этабы ахырына кадәр сылтама буенча HR-платформада теркәлергә кирәк.