Илсур Һадиуллин: «Ел укытучысы-2022» конкурсына узган ел белән чагыштырганда күбрәк педагог катнашу теләге белдерде
Казанда бүген «Ел укытучысы - 2022» бөтенроссия конкурсының төбәк этабына йомгак ясадылар. Җиңүчеләрне бүләкләү тантанасында Татарстан мәгариф һәм фән министры Илсур Һадиуллин билгеләп үткәнчә, 800 дән артык педагог ярышларда катнашкан, бу узган ел белән чагыштырганда күбрәк.
«Быел республиканың 38 районыннан 800 дән артык педагог, шул исәптән укытучылар һәм тәрбиячеләр, бу конкурста катнаштылар. Бу узган елга караганда күбрәк. Россиянең башка төбәкләреннән безгә татар теле һәм әдәбияты укытучылары килде», - диде Мәгариф һәм фән министрлыгы башлыгы.
Һадиуллин фикеренчә, барлык конкурсантлар - үз һөнәрләренә һәрвакыт тугры булган чын укытучылар. «Безнең укытучылар шартлар тудыра, укыта, тәрбияли, үз белемнәрен яшь буынга тапшыра. Алар бик зур миссия башкаралар. Ә бәйгедә җиңүче бөтенроссия дәрәҗәсендә үз мөмкинлекләрен күрсәтәчәк. Татарстан Россия дәрәҗәсендә лаеклы урын алыр дип өметләнәбез», - диде ул.
Министр ассызыклаганча, конкурста катнашучылар тагын бер тапкыр «Татарстан укытучыларының иң лаеклы, креатив һәм акыллы булуын» исбатлаганнар.
Татарстанда «Ел укытучысы - 2022» конкурсында Казан шәһәренең 2 нче лицей-интернатының тарих һәм җәмгыять белеме укытучысы Илсур Җиһаншин җиңүче булды. Һөнәри осталык бөтенроссия конкурсы финалында нәкъ менә ул республиканы тәкъдим итәчәк.