РФ Хөкүмәте вице-премьеры Казанда балалар бакчасында булды

РФ Хөкүмәте Рәисе урынбасары Ольга Голодец Казанга эшлекле сәфәре барышында Республика онкология диспансерында һәм 44 нче балалар бакчасында булды. Аны ТР Президенты Рөстәм Миңнеханов озата барды.
Меридиан урамындагы 44 нче балалар бакчасында Ольга Голодец балалар белән аралашты, алар өчен булдырылган шартларны югары бәяләде. ТР мәгариф һәм фән министры Энгель Фәттахов хәбәр иткәнчә, Татарстанда хәзерге вакытта 1950 балалар бакчасы исәпләнелә, аларда 188 мең бала тәрбияләнә. 2011 нче елда ТРда “Бәләкәч” республика программасы буенча балалар бакчаларында 13 меңнән артык яңа урын булдырылган, бу максатларга республика бюджетыннан 3,2 млрд сум бүленгән. Республикада 28 шәхси балалар бакчасы да эшли, аларда 2 мең бала тәрбияләнә.
Энгель Фәттахов Татарстанның балалар бакчалары төзелеше федераль программасында катнашу параметрларын әйтте – 2015 нче ел ахырына ТР һәм РФ бюджетлары акчаларына республикада балалар бакчаларында тагын 30 мең яңа урын булдырылыр, дип планлаштырыла, бу 3 яшьтән өлкән балалар арасында чиратны тулысынча бетерәчәк.
Ольга Голодец хәбәр иткәнчә, бүленгән федераль акчаларны уңышлы үзләштергәндә, төбәкләр планлаштырылган вакыттан алда барлык акчаларны алуга ниятләнә ала. Моңа бәйле рәвештә, РФ вице-премьеры ТР җитәкчелеген балалар бакчалары төзелешенә әзер булырга чакырды.
Моннан тыш, Ольга Голодец сүзләренчә, балалар бакчалары төзелешендә ел ярым яшьтән өч яшкәчә булган сабыйларга да игътибар итәргә кирәк.