Рособрнадзор: Россия төбәкләрендә БДИ уздыру өчен кәгазь һәм картриджлар запасы җитәрлек

2022 елның 11 апреле, дүшәмбе

Россия төбәкләрендә Бердәм дәүләт имтиханнары уздыру өчен кәгазь, картриджлар, канцелярия әсбаплары, антисептиклар һәм бүлмәләрне җыештыру өчен кирәк-яраклар запасы җитәрлек.

«Бездә булган мәгълүматларга караганда, барлык төбәкләрдә дә кәгазь, картриджлар һәм башка материаллар тулы күләмдә бар, шул исәптән планлы резервны тутыру өчен аларны сатып алу дәвам итә», - диде Рособрнадзор җитәкчесе Анзор Музаев.

Анзор Музаев белдергәнчә, БДИ уздыру барлык кирәкле әйберләр белән дә тәэмин ителәчәк, имтиханнар график буенча уздырылачак.

Бердәм дәүләт имтиханының төп вакыты 26 майдан 2 июльгә кадәр була. Хәзер имтиханнарны вакытыннан алда тапшыру чоры төгәлләнеп килә, бу вакытта кәгазьләр һәм башка материаллар белән проблемалар булмаган.