Миңнехановка һәм Фальковка Әлмәттә Югары нефть мәктәбе проектын тәкъдим иттеләр
Татарстан Президенты Рөстәм Миңнехановка һәм Россия Фән һәм югары белем министры Валерий Фальковка Әлмәттә «Югары нефть мәктәбе» фәнни-тикшеренү һәм уку үзәге – кампус төзелеше проектын тәкъдим иттеләр. Аны Әлмәт дәүләт нефть институты базасында оештыру планлаштырыла.
Кампус составына уку-лаборатория һәм лаборатория-тикшеренү корпуслары, студентлар өчен ике тулай торак бинасы, спорт һәм мәдәни үзәкләр, җир асты парковкасы, ачык павильон, фәнни хезмәткәрләр һәм укытучылар өчен торак йортлар, мини-кунакханә керер дип көтелә. Проект буенча чыгымнар, федераль грант һәм «Татнефть» ГАҖ акчаларын да кертеп, 13,7 млрд сум дип бәяләнә.
Әлмәт дәүләт нефть институты территориясендә Рөстәм Миңнеханов һәм Фальков студентлар тулай торагын карадылар, анда барлык бүлмәләр дә «акыллы йорт» системасы белән җиһазландырылган, кирәкле җиһазлар һәм көнкүреш техникасы урнаштырылган. Монда мобиль гражданнар өчен яшәү бүлмәләре бар. Кунаклар шулай ук лаборатория-тикшеренү корпусында һәм спорт үзәген төзү мәйданчыгында булдылар.
Татарстан быел федераль конкурска Казанда, Түбән Камада һәм Әлмәттә кампуслар булдыру буенча өч проект тәкъдим итте.
Проектлар дәүләт-шәхси партнерлык буенча тормышка ашырылырга тиеш. Шәхси инвесторны җәлеп итеп, биналар һәм корылмалар комплексын төзү яки реконструкцияләү һәм объектны аннан соң концессиягә тапшыру күздә тотыла.
Конкурста катнашу өчен гаризалар җыю 1 августта тәмамланды, җиңүчеләр декабрь башында игълан ителәчәк. Россиядә 2030 елга кимендә 30 университет кампусы төзү проектларын гамәлгә ашыру планлаштырыла.