Россиянең барлык мәктәпләре 1 сентябрьдә көндезге режимда эшли башлады
Россия Федерациясе мәгариф министры Сергей Кравцов 1 сентябрьдә А.С. Грибоедов исемендәге Мәскәүнең 1529 нчы мәктәбендә узган тантаналы линейкада катнашты. Илнең барлык мәктәпләре дә көндезге режимда эшли башлады, аларга 17,5 миллионнан артык бала укырга килде.
Сергей Кравцов укучыларны, аларның ата-аналарын һәм укытучыларны Белем көне белән котлады, аларга хезмәтләре һәм түземлекләре, укучыларның мәнфәгатьләренә игътибарлары булганнары өчен рәхмәт белдерде.
Линейка барышында Дәүләт флагын күтәрү һәм Россия Дәүләт гимнын тыңлау тантанасы булды. Шулай итеп, мәктәпләрдә атна саен тантаналарга символик старт бирелде.
Сергей Кравцов 1 сентябрьдә капиталь ремонттан соң меңнән артык мәктәп ачылуын, аларда заманча җиһазлар барлыкка килүен, ә укытучылар квалификацияләрен күтәрүне билгеләп үтте. Федераль программа буенча 2026 елга кадәр барлыгы 7300ләп бина ремонтланачак. Моннан тыш, уку елы башына 155 яңа мәктәп ачылды. Президент программасы буенча 2019 елдан 2024 елга кадәр 1300 яңа мәктәп төзеләчәк.
Быел беренче тапкыр физик культура, сынлы сәнгать, музыка укытучыларының съездлары үткәреләчәк, дип хәбәр итте мәгариф министры.
Сергей Кравцов сөйләгәнчә, 1 сентябрьдә Луганск һәм Донецк Халык Республикаларында, Харьков, Херсон һәм Запорожье өлкәләрендә 1300дән артык мәктәп ачыла.
Белем бирү процессын тәэмин итү өчен 7 млн. нан артык дәреслек куелды, укытучылар квалификацияләрен күтәрделәр. Бу төбәкләргә Мәгариф министрлыгы тарафыннан ярдәм итү системасы дәвам итәчәк. Күп каналлы кайнар линия тулы режимда эшли.