Рособрнадзор урта махсус уку йортлары өчен Бөтенроссия тикшерү эшләрен үткәрү графигын раслады
Рособрнадзор көллиятләр һәм техникумнар өчен Бөтенроссия тикшерү эшләрен үткәрү графигын раслады. Аларда укучы студентлар ВПР 15 сентябрьдән 8 октябрьгә кадәр язачаклар.
"Быел Урта һөнәри белем бирү учреждениеләре укучылары өчен ВПР икенче тапкыр узачак. Узган елдагы кебек үк, көндезге уку формасындагы студентларга тикшерү эшләрен язарга туры киләчәк", - дип искәртте Мәгариф һәм фән өлкәсендә күзәтчелек буенча Федераль хезмәттә.
Бөтенроссия тикшерү эшләрен беренче курс студентлары, шулай ук узган уку елында гомуми белем предметларын (икенче яки өченче курс) үзләштерүне төгәлләүчеләр башкарачак.
Студентлар белем бирү оешмасы сайлый торган профиль предметлары буенча ВПР тапшырачак. Бу рус теле, математика, физика, химия, биология, география, тарих, җәмгыять белеме, чит телләр, информатика булырга мөмкин. Моннан тыш, аларга укыту метапредметик нәтиҗәләрен бәяләү белән тикшерү эшләрен башкарырга туры киләчәк.
Барлык эшләрне тикшерү 25 октябрьгә кадәр тәмамланырга тиеш. Техникумнар һәм колледжлар белем бирү процессын камилләштерү өчен, ә региональ мәгариф белән идарә итү органнары системаның хәзерге торышын анализлау һәм аны үстерү программаларын формалаштыру өчен куллана ала.