Татарстан укучылары арасында информатика һәм ИКТ, тарих, химия һәм әдәбият предметлары аеруча популяр

Бу хакта Бердәм дәүләт имтиханын тапшыруга багышланган матбугат очрашуында ТР Мәгариф һәм фән министрының беренче урынбасары Данил Мостафин хәбәр итте.
Гомумән алганда, 2012-2013 уку елында 21 меңгә якын кеше БДИ тапшырган. Аларның 19948е – быел мәктәп тәмамлаучылар.
2013 елда уртача барлык предметлардан да диярлек уртача балл узган елга караганда югарырак булган. Бигрәк тә химия (14 баллга күбрәк), инглиз теле (18,8 баллга күбрәк), физика (11 баллга күбрәк) буенча күрсәткечләр яхшы. Әмма быел география предметы буенча күрсәткечләрнең 0,8 процентка түбәнрәк булуы ачыкланган. Урынбасар сүзләренчә, бу алар өчен көтелмәгәнрәк хәл булган. Алга таба, бу өлкәдәге вәзгыятьне яхшырту максатыннан, уку йортлары, методик берләшмәләр һәм педагогларның белем күтәрү институтлары белән берлектә эшләү көтелә.
Теге яки бу предмет буенча минималь чикне уза алмаган укучылар саны да быел кимегән. Бу физикага (11,3 проценттан 4,6 процентка кадәр төшкән), тарихка (8,1 проценттан 3 процентка кадәр төшкән), химиягә (4,9 проценттан 2,8 процентка кадәр төшкән) кагыла.
Узган елда мәктәп тәмамлаучыларның 1,14 проценты (233 укучы) аттестатсыз калса, быел бу күрсәткеч 0,6 процент (113 укучы) тәшкил иткән. Данил Мостафин сүзләренчә, ни өчен шулай килеп булганлыгына тирән анализ ясалачак, нәтиҗәләр чыгарылачак.
Быел БДИ вакытында Чүпрәле, Арча, Яңа Чишмә, Актаныш һәм Буа районнарында, Казанда 33 укучы имтиханнан чыгарылган. Шунысын билгеләп үтәргә кирәк: теге яки бу кагыйдәне бозган укучыларны имтиханнан чыгару очраклары кимеми. Шулай да әлеге укучылар рус теле һәм математикадан кабат имтиханга кертелгән, чөнки аларның урта белем турында аттестат аласылары бар. Башка предметлар буенча кабат имтиханнарга керү мөмкинлеге бирелмәгән. Бу – республиканың Дәүләт имтихан комиссиясе карары. Урынбасар билгеләп үткәнчә, закон бозасың икән, җәзасын да алырга туры килә. БДИ чорында административ җаваплылыкка тарту турында 61 протокол төзелгән.