Фәрит Мөхәммәтшин Авиация уку үзәгендә булды
Татарстан Дәүләт Советы Рәисе һәм “Бердәм Россия” төбәк бүлеге секретаре Фәрит Мөхәммәтшин бүген Лаеш техник-икътисадый техникумында булды. Парламент җитәкчесе белдергәнчә, мәгариф учреждениесе "үзенең алдынгы юнәлешләре һәм технологияләре белән гаҗәпләндерде һәм сокландырды".
Авыл өчен кадрлар әзерләгән гади авыл хуҗалыгы техникумы шундый кардиналь рәвештә үзгәрергә - үз көчләрен авиация өчен белгечләр әзерләүгә юнәлдерергә мөмкин, дип уйлый да алмадым. Биредә авиация техникасын җитештерүгә һәм хезмәт күрсәтүгә, пилотсыз очкычларны эксплуатацияләүгә өйрәтәләр. Үзебезнең техниканы җитештерү генә түгел, аңа хезмәт күрсәтә алырлык белгечләр дә әзерләргә кирәк бит ", - дип белдерде Мөхәммәтшин.
Техникум 2016 елда ресурс үзәге статусын алды, шуңа бәйле рәвештә Россия авиация комплексы предприятиеләре өчен белгечләр әзерли башлады. Узган елдан "Пилотсыз авиация системаларын эксплуатацияләү" белгечлеге буенча укучылар җыю башланды. Техник профильдән тыш, икътисадый, хокук саклау, социаль һәм башка юнәлешләр буенча белгечләр әзерләнә.
Мәгариф учреждениесе директоры Эльвир Якупов Ф.Мөхәммәтшинга узган ел техникумда Авиация уку үзәге ачылуы турында сөйләде. Хәзерге вакытта Татарстанда бу авиапредприятиеләрнең инженер-техник персоналының квалификациясен күтәрү өчен Росавиация сертификаты булган бердәнбер уку йорты. Якын үзәкләр Мәскәүдә, Ульяновск һәм Самарада урнашкан.