IT студентлар саны ике тапкыр артты, ләкин бу барыбер җитәрлек түгел

Татарстан мәгариф системасы ел саен IT-өлкә өчен 5 меңгә якын белгеч әзерли ала, дип хәбәр итте республика мәгариф һәм фән министрының беренче урынбасары Андрей Поминов. Аның сүзләренә караганда, хәзер югары уку йортларында 10 меңнән артык кеше укый, соңгы биш елда югары белем бирү программалары буенча кабул итүнең контроль саннары 50% ка диярлек арткан. "Үсеш зур, әмма, бу барыбер җитәрлек түгелдер. Техникумнарда һәм көллиятләрдә 5,5 меңнән артык студент укый», - дип билгеләп үтте ул Татарстан Республикасы Дәүләт Советының Икътисад, инвестицияләр һәм эшкуарлык комитеты утырышында. Поминов сүзләренчә, югары уку йортларында 5,2 меңнән артык студент федераль бюджет хисабына белем ала. IT-юнәлеш буенча иң күп студентлар КФУда укый (2,7 меңнән артык).  Моннан тыш, Татарстанда "IT-куб" цифрлы үсеш үзәге эшли, анда 7-18 яшьлек балалар программалаштыру, мобиль җайланмалар, виртуаль һәм өстәмә чынбарлык өчен кушымталар эшләү белән танышалар, роботларны программалаштырырга өйрәнәләр. Республикада өченче «IT-куб» ел ахырына кадәр «Алабуга» МИЗда ачылачак, дип билгеләп үтте мәгариф һәм фән министрының беренче урынбасары. Ул билгеләп үткәнчә, Татарстанның биш югары уку йортында цифрлы кафедралар булдырылган. Алар Казан федераль университетында, Туполев исемендәге КНИТУ-КАИда, Казан дәүләт медицина университетында, Казан милли тикшеренү технология университетында һәм Казан дәүләт энергетика университетында.