Вакытыннан алда БДИ-2023 тапшыруда 18,3 мең кеше катнашачак
Россиядә бердәм дәүләт имтиханын (БДИ) вакытыннан алда уздыру чоры башлана. Анда катнашу өчен 18,3 мең кеше гариза биргән, шуларның 15 меңнән артыгы - узган елларны тәмамлаучылар.
Вакытыннан алда чор 20 мартта башлана, ул география һәм әдәбият буенча имтиханнардан башлана. 23 мартта катнашучылар рус теле буенча БДИ тапшыра ала, 27 мартта - база һәм профильле математика буенча, 30 мартта - биология, физика һәм чит телләр буенча язма өлеше. 3 апрельдә чит телләр буенча (телдән өлеш), 6 апрельдә җәмгыять белеме һәм информатика буенча , 10 апрельдә тарих һәм химия буенча узачак. 12-19 апрель көннәрендә вакытыннан алда чор расписаниесендә барлык предметларны тапшыру өчен резерв көннәре каралган. БДИ оештыру өчен Россиянең 84 төбәгендә 307 имтихан үткәрү пункты җәлеп ителәчәк.