Мәгариф системасында документация йөкләнешен киметү Бөтенроссия мәгариф профсюзлары утырышында каралды
Мәгариф системасында документлар йөкләнешен киметү эше дәвам итә, дип сөйләделәр Рособрнадзор җитәкчесе урынбасары Евгений Семченко һәм Рособрнадзор җитәкчесе киңәшчесе Наталья Алтыникова. Күрсәтелгән утырышта мәгариф системасында документация йөкләнешен киметү моделе һәм план-графигы турында фикер алыштылар.
Мәктәп укытучыларын кирәгеннән артык документлар йөкләнешеннән азат итү эше инде икенче ел бара. Россия Федерациясенең алты субъекты мисалында (Пенза өлкәсе, Мәскәү өлкәсе, Чувашия Республикасы, Липецк, Түбән Новгород өлкәләре һәм "Сириус территориясе") ведомствоара эшче төркем мәктәпләргә керә торган сорауларга анализ ясый һәм аларны чикләү өчен карарлар чыгара.
Евгений Семченко ассызыклаганча, Россия мәгариф күзәтчелегенең педагогик хезмәткәрләргә документлар йөкләнеше мәсьәләләре буенча кайнар линиясе эшли. "Кертелгән чикләүләрне үтәмәгән очракта, педагоглар кайнар линия электрон почтасына мөрәҗәгатьләр җибәрергә мөмкин: stop_nagruzka@obrnadzor.gov.ru. Шул ук вакытта төбәкне, мәктәпне һәм кире элемтәнең уңайлы ысулын күрсәтергә кирәк. Керә торган барлык мөрәҗәгатьләр Рособрнадзор тарафыннан индивидуаль тәртиптә карала ", - дип ачыклык кертте ул.