Түбән Кама укучылары экология проектын гамәлгә ашыруга грант отты
Түбән Каманың 21 нче урта мәктәбенең “Урман туганнар” мәктәп урманчылыгы IV грант конкурсында җиңү яулады. Алар “Чиста урман бүген, иртәгә - мәңгегә” проектын тәкъдим иттеләр.
СИБУР “Яшел формула” урман климаты программасы һәм “Яхшы эшләр формуласы” социаль инвестицияләр программасы кысаларында мәктәпләр һәм мәктәп урманчылыклары өчен IV грант конкурсында җиңүчеләрне билгеләде. Эксперт бәяләве нәтиҗәсендә иң яхшылар дип ун проект танылды. Иң яхшы эшләр авторлары урманнарны өйрәнү һәм әйләнә-тирә мохитне саклау өлкәсендә тикшеренү һәм гамәли эшчәнлекне дәвам итү өчен дипломнар һәм кыйммәтле призлар белән билгеләп үтеләчәк, дип хәбәр ителә.
Конкурска Түбән Кама, Красноярск һәм Красноярск краеннан, Төмән өлкәсенең Тобольск шәһәре һәм Тобольск районыннан, шулай ук Томск өлкәсендәге мәктәпләрдән, мәктәп урманчылыкларыннан, өстәмә белем бирү учреждениеләреннән һәм волонтерлык экология оешмаларыннан барысы 34 эш керде.
Конкурста катнашучылар урман үсемлекләренең һәм хайваннарының төр төрлелеген өйрәнүгә, утырту барышында алынган нәтиҗәләргә, имән, эрбет, тирәк һәм башка агачлар үсентеләрен мониторинглауга һәм контрольдә тотуга багышланган укыту-тикшеренү эшләре җибәрделәр.