Казанда Укытучылар көненә багышланган тантана узды

Казанда Муса Җәлил исемендәге Опера һәм балет театрының зәвык белән эшләнгән залында узган Укытучы көне күпләр күңеленә миллилеге, республика мәгариф системасының гасырлар төпкеленнән килгән традицияләрнең саклавы, аларның заман технолгияләре белән гармонияле үрелеп баруы турында сөйләүче чара буларак кереп калыр. Тантана башында күрсәтелгән, илнең икътисади нигезе мәктәптә үк салынуы, казанышлары нәкъ менә укытучылары белән бәйле икәнлеге турында сөйләгән фильм ТР Президенты Рөстәм Миңнехановка да тәэсир итте.
“Бу кыска гына фильм безнең белем бирү системасының нинди икәнлеген, аның ничек барлыкка килүен, анда кемнәр эшләвен ачык күрсәтте. Республика потенциалы, нәтиҗәләр һәм уңышларыбыз - боларның барысы да кешеләр һәм белем бирү потенциалы өчен эшли. Мин теге яки бу төбәк үсешенә күп факторлар йогынты ясый дип уйлыйм. Берәүләр моны чимал базасы ди, икенчеләр сәнәгать базасы белән бәйләп карый. Әмма моның иң башында ук кеше капиталы, кеше потенциалы тора. Бу кешеләр зур бурычларны хәл итәргә сәләтле. Безнең республикабыз шундый булуы белән монда утыра торган кешеләргә бурычлы. Бик зур рәхмәт сезгә”, – диде Рөстәм Миңнеханов.
Президент фикеренчә, гомумән алганда, федераль дәрәҗәдә дә, республика күләмендә дә укытучыга мөнәсәбәт үзгәрә бара. Хезмәт хакы буенча да карарлар кабул ителә. “Безнең республикада тормышка ашырыла торган “Бәләкәч”, мәктәпләрне ремонтлау буенча программалар, балалар бакчалары төзү, белем бирүдә яңа технологияләр куллану, дөнья күләмендә танылган партнерларны җәлеп итү – боларның барысы да безгә якын киләчәктә һәм аннан соң да республикага конкурентлыкка сәләтле булып калырга мөмкинлек бирер дип уйлыйм. Бездә булган потенциал, сез балаларга биргән белем ярдәмендә моңа ирешә алырбыз, дип уйлыйм”, - диде Рөстәм Миңнеханов, уктучыларга мөрәҗәгать итеп.
Рөстәм Миңнеханов укытучыларны бәйрәм белән котлап: “Киләчәктә дә республика гөрләп торсын. Сезнең хезмәтегезгә сокланабыз һәм рәхмәтебезне белдерәбез”, - диде һәм бер төркем укытучыларга Россия һәм Татарстан бүләкләрен тапшырды.
Татарстан Президентыннан иң зур бүләкккә - автомобильгә бүген шулай да Яр Чаллының 26 нчы гимназиясе математика укытучысы, яхшы нәтиҗәләргә ирешкән бик күп укучылар әзерләп чыгарган педагог Любовь Баева лаек булды. Ул бүләкне алырга чыкканда нык кына каушады, көтелмәгән хәл булуын әйтте, республикада белем бирү системасына карата яхшы мөнәсәбәт өчен Рөстәм Миңнехановка рәхмәт белдерде. Алга таба да укучыларының бик яхшы нәтиҗәләргә ирешүе өчен тырышачагына ышандырды.
Соңгы өч елда гына Любовь Баеваның 44 укытучысы республика олимпиаларында алдынгы урыннарны яулаган, сигезе бөтенроссия бәйгеләрендә җиңү яулаган. Аның укучылары арасында Халыкара шәһәрләр турнирында җиңгән 4 укучы бар. Шулай ук Урал математика турниры, укучыларның бөтенкытай математика олимпиадасы, Мәскәү дәүләт университеты, Мәскәү физика-техник институты, Югары икътисад мәктәбе оештырган бәйгеләрдә дә җиңгән аның укучылары. Бердәм дәүләт имтиханында математика буенча 5 укучысы 100 балл җыйган.