Кравцов Казанда : туган телләр укытучыларына һәм тәрбиячеләренә һәрвакыт ярдәм итәчәкбез
Россиядә һәрвакыт туган тел укытучыларына һәм тәрбиячеләренә ярдәм күрсәтәчәкләр. Бу хакта РФ мәгариф министры Сергей Кравцов Казанда «Туган тел һәм туган әдәбиятның иң яхшы укытучысы» Бөтенроссия конкурсының ябылу тантанасында белдерде.
Кравцов фикеренчә, конкурс исемен киңәйтергә һәм аны «Иң яхшы туган тел һәм әдәбият укытучы һәм тәрбиячесе» дип атарга кирәк. Ул шулай ук конкурста җиңүче тәрбиячеләргә түләүне арттырырга кирәк, дип ышана.
«Быелдан туган тел укытучысына 250 мең сум түләнде, ләкин ни өчендер тәрбиячегә 200 мең сум . Белем бирүнең һәр дәрәҗәсе мөһим - мәктәпкәчә белем бирү дә, мәктәп һәм югары уку йортлары да. Без моны һичшиксез төзәтербез», - дип ассызыклады министр. Мәгариф министрлыгы башлыгы билгеләп үткәнчә, конкурс өченче ел рәттән уза һәм елдан-ел ул үсә, киңәя. Мәсәлән, былтыр укытучылар 32 тел тәкъдим итсә, быел - 36.
Конкурста беренче урынны Улан-Удэның 1 нче лицей-интернатның бурят теле укытучысы Светлана Раданжапова алды.
Тәрбиячеләр арасында беренче урынны Уфаның 18 нче балалар бакчасыннан Алия Ишдавлетова алды.
Икенче урында - 19 нчы гимназиянең татар теле укытучысы Ләйлә Гарифҗанова һәм 24 нче балалар бакчасы педагогы Екатерина Балакаева.
Өченче урында – Липецның 77 нче мәктәбенең туган тел укытучысы Ольга Мазурова һәм Донецк Халык Республикасының "4 нче номерлы Шахта ясле-бакчасы” тәрбиячесе Ольга Бутенко.
Казанда 16-21 сентябрьдә “Туган тел һәм туган әдәбиятның иң яхшы укытучысы” бөтенроссия һөнәри конкурсының йомгаклау этабы узды. Быел анда Россиянең 79 төбәгеннән укытучылар һәм тәрбиячеләр катнашты.
Киләсе елда конкурс Улан-Удэда узачак.