Татарстанның ике мәктәп җитәкчесе “Россия ел директоры” конкурсының финалына чыкты

2024 елның 23 сентябре, дүшәмбе

23 сентябрьдә, Калугада «Россия ел директоры» Бөтенроссия һөнәри конкурсының йомгаклау этабы башланды. Илнең барлык почмакларыннан иң яхшы мәктәп директорлары җиңүче исеме өчен көрәшәчәк. Алар арасында - Татарстаннан ике гомуми белем бирү учреждениесе директоры бар . Бу Казан 179 нчы гимназия директоры Эльвира Наумова һәм Мамадышның академик К.А.Вәлиев исемендәге 2 нче мәгариф үзәге директоры Салават Гыймранов.

Йомгаклау этабы ике турдан тора, һәм икесе дә көндезге форматта узачак. Чаралар конкурс сайтында һәм ВКонтакте социаль челтәрендә трансляцияләнәчәк.

Җиңүчеләр һәм призерлар 5 октябрьдә Кремльдә, Халыкара укытучылар көнендә тантаналы чарада билгеле булачак.