БРИКС саммитында студент отрядларының 25 вәкиле эшләячәк
Татарстанның студент отрядларының 25 вәкиле БРИКС саммитында официантлар һәм пешекчеләр ярдәмчеләре сыйфатында эшләячәк. Республика студентлар хезмәт отрядлары үзәге директоры, Россия студентлар отрядларының Күзәтү советы әгъзасы Василий Ислаев сүзләренчә, студентлар сервис белгечлекләре буенча укулар узган һәм өченче хезмәт семестрында үзләрен күрсәткәннәр .
Ел башыннан Россия студентлар отрядларының сервис юнәлешендә 25 меңгә якын студент эшләде. Алар пешекчеләр, официантлар, барменнар, яшелләндерүчеләр һәм коткаручылар булып хезмәт иткән. Алар арасында 1,2 меңнән артык татарстанлы бар, алар бөтен Россия буенча кунакханә комплексларында һәм балаларны савыктыру лагерьларында ярдәм иткәннәр.
Студентлар хезмәт отрядларының республика үзәге Татарстан Республикасы Яшьләр министрлыгы карамагындагы оешма булып тора һәм яшьләрне үз-үзләрен тормышка ашыру өчен мөмкинлекләр тудыра, бу «Мәгариф» милли проекты максатларына туры килә.